- பிக்கபூ -

மூவாயிரம் வெள்ளி. ஆனால் வெறும் ஐநூறு வெள்ளிக்கு கிடைத்தது. முழங்கை அளவுள்ள கிளி. நீலவண்ண இறகுகள் கொண்டது. கணவனின் மரணத்திற்கு பின் அவரின் செல்லப்பிராணியை மனைவியால் பார்க்க முடியவில்லையாம். அதனாலேயே குறைந்த விலையில் விற்றார். இதுதான் சமயமென வாங்கிவிட்டேன்.

நன்றாக பயிற்சி அளிக்கப்பட்ட கிளிதான். ஆங்கிலத்தில் பேசினால் அதற்கு புரிகிறது. அதற்கு ஏற்றார் போல கத்தவும் செய்கிறது. 

அதனிடம் எனக்கு மிகவும் பிடித்தது அதன் சத்தம். ஏதோ ஒரு இசையை நினைவுப்படுத்தும். குறிப்பாக அதன் கூண்டின் அருகில் நின்று, முகத்தை மறைத்தும் காட்டியும் 'பிக்கபூ' என்று சொன்னால் பதிலுக்கு அதுவும் 'பிக்கபூ' என்று சொல்லும். முந்தைய பராமறிப்பாளர் கற்றுக் கொடுத்திருக்கிறார். 

ரொம்பவும் பாசமாகத்தான் வளர்த்திருக்கிறார் போல. அவருக்கு பின் இப்படி விற்கப்படுமென நினைத்து பார்த்திருக்க மாட்டார்.

எனக்கு இப்போது ஒரு கேள்வி, வீட்டில் எல்லோரும் தூங்குகிறார்கள் நானும் என் அறையில் பாதி தூக்கத்தில் இருக்கிறேன். வரவேற்பறையில் தனியாக இருக்கும் கிளி, யாருடன் இப்போது 'பிக்கபூ' விளையாடிக் கொண்டிருக்கிறது?