- இயந்திரப்பறவை -

முதன் முறையாகப் பார்க்கிறார்கள். உற்சாகம் பொங்க ஆராவாரத்துடன் சிறுவர்கள் அதனைப் பின் தொடர்ந்து ஓடிக்கொண்டிருக்கிறார்கள். அதன் சத்தத்திற்கு ஈடாக அவர்களும் ஆர்ப்பரிக்கிறார்கள்.

அதிகம் வெளி உலகம் அறியாத மக்களின் கூட்டமைப்பு. அவர்களே விதைத்து அவர்களே விற்று அதை அவர்களே பண்டமாற்றுச் செய்து வாழ்ந்து வருகிறார்கள். எப்போதாவது யாராவது எதையாவது அவர்களுக்குக் கொடுத்துச்செல்வார்கள்.

வானில் பறக்கும் பெரிய பறவையாய் இருந்த விமானம் அவர்களுக்கு ஆச்சரியம் கொடுக்காமல் என்ன செய்யும். சிறுவர்கள் சட்டையைக் கழட்டிவிட்டார்கள். வானில் தெரியும் அதிசயத்திற்குத் தங்களின் சட்டையைக் காட்டிக்கொண்டே ஓடுகிறார்கள்.

குடியிருப்பில் உள்ளவர்களும் குழந்தைகளின் குதூகலத்தில் கலந்துகொண்டார்கள். ஒருவரைப் பார்த்து ஒருவர் சிரித்துக்கொண்டார்கள்.

எப்படியாவது அந்தப் பறவையைப் பிடித்து விடும் முயற்சியில் ஒருவன் மட்டும் முன்னணியில் ஓடிக்கொண்டிருந்தான். ஊரே அவனுக்கு உற்சாகம் கொடுக்கவும், மற்ற சிறுவர்களும் போட்டிக்குத் தத்தம் வேகத்தை அதிகப்படுத்தினார்கள்.

இரண்டு மூன்று முறைச் சுற்றிவந்த விமானம் மேன்மேலும் உயரம் போனது. எல்லோரும் பார்த்துக்கொண்டிருக்க, அந்த அதிசயப் பறவை சில முட்டைகளைப் போட்டது.

அந்த முட்டைகள் தங்களை நோக்கி வருவதைக் கவனித்தவர்கள் தங்களின் கைகளைத் தூக்கி முட்டை உடையாமல் பிடிக்க நினைத்துக் கொண்டிருக்க....