- பெயரில் என்ன இருக்கிறது? -

செல்வனுக்கு ஒரு வித்தியாசமானத் தேடல் இருந்தது. என்னதான் பகுத்தறிவு பகலவன்களாய் ஜொலித்தாலும்

திருமணத்திற்கு ஜாதியை எப்படியாவது பார்த்துவிடுபவர்களின் மத்தியில் செல்வனின் தேடல் உண்மையிலே வித்தியாசமானதுதான்.

அவன் தேடுவது அதை மட்டும்தான். ஆமாம், அது ஒன்றைத்தான். வேறெதுவும் செல்வனுக்கு முக்கியமாகப்படவில்லை.

அழகு - அது வயதைப் பொறுத்து மாறிக்கொண்டே இருக்கும்.

படிப்பு - கல்யாணத்திற்கு பிறகு கூட படிக்கலாம்.

குடும்பம் - குழந்தை குட்டி என ஆனப்பிறகு சரியாக அமைத்துக்கொள்ளலாம்.

பொருத்தம் - ஜோதிடத்தை முழுமையாக நம்பவேண்டியதில்லை.

பணம்/வரதட்சணை - தேவையில்லை; உழைத்து சம்பாதித்துக் கொள்ளலாம்.

செல்வன் எல்லாவற்றுக்கும் பதில் வைத்திருந்தான். மற்ற எல்லாவற்றிலும் அவனால் சமரசம் செய்ய முடிந்தது. ஒன்றைத்தவிர. அது பெயர். ஆமாம் பெயர் மட்டும்தான். அந்தப் பெயரில்தான் அவனுக்கு மனைவி வேண்டும்.

ஒரே மாதத்தில் ஆசை நிறைவேறியது. அவன் தன்னை அதிஸ்டசாலியாக உணர்ந்தான். பல ஆண்டுகளாக தன் வலது பக்க மார்பில் பச்சை குத்தப்பட்டப் பெயரை இனி எப்போதும் அவன் அழிக்கவேண்டாம். யாருக்கும் காரணம் சொல்லவேண்டாம்.