4:4:4

நடுகல்.காம் மின்னிதழுக்கு என் படைப்புகளாக சிறுகதைகள், குறுங்கதைகள், கவிதைகள் போன்றவற்றை எழுதுவதோடு 'மாதம் ஒரு மலேசிய புத்தகம்' என்ற மாதாந்திர தொடரையும் எழுதிவருகிறேன். இவ்வாண்டு ஜனவரி தொடங்கி டிசம்பரில் ஒரு டஜன் புத்தகங்களைப் பற்றி எழுதியுள்ளேன்.

அவை 4 சிறுகதை தொகுப்புகள், 4 நாவல்கள், 4 கவிதை தொகுப்புகள்என அமைந்துவிட்டது ஆச்சர்யம்தான்.

அடுத்த ஆண்டும் இத்தொடரை தொடர்ந்து எழுத வாய்ப்பு கிடைத்துள்ளது. நடுகல்.காம் குழுவினர்க்கும் அதன் ஆசிரியர் வா.மு.கோமுவிற்கும் என் அன்பும் நன்றியும்.

நான் வாசித்த மலேசிய புத்தகங்கள் குறித்த என் வாசிப்பு அனுபவத்தை நீங்கள் வாசித்து உங்கள் கருத்துகளைப் பகிர்ந்து கொள்ளலாம்.

அதற்கான இணைப்பு 👉https://share.google/6VgmDrTXWVYLFcbck

வாசிப்பை கொண்டாடுவோம்...

இந்த ஆண்டில் வாசித்த புத்தகங்கள்; இதுவரை வாசித்தவையில் இருந்து சற்றே அதிக எண்ணிக்கையில் இருப்பதாகத் தோன்றுகிறது.

வழக்கமாக ஒரு பெட்டியில்தான் இருக்கும். இம்முறை இன்னொரு பெட்டியும் சேர்ந்திருக்கிறது. எல்லாவற்றையும் எடுத்து மீண்டும் அலமாரியில் அடுக்க வேண்டும். அதற்கு முன் அவற்றை பட்டியலிட வேண்டும். சில குறிப்புகள் எழுத வேண்டும்.

அதற்கு பின்னர்தான் புத்தாண்டு தொடக்கம் வாசிக்க வேண்டியதை மீண்டும் காலி பெட்டியில் வைத்து நிரப்ப வேண்டும்.

ஒரு புத்தகத்தை வாசித்தபடி புத்தாண்டை கொண்டாட வேண்டும்..
வாசிப்பை நேசிக்கிறவர்களுக்கு இதுதானே புத்தாண்டு கொண்டாட்டம்...

#தயாஜி #புத்தகச்சிறகுகள்_புத்தகக்கடை

துணையாய் வரும் சொற்கள்

துணையாய் வரும் சொற்கள் -

‘தனித்த சொற்கள்’ எஸ்.ராமகிருஷ்ணன் எழுதிய உலக இலக்கியக் கட்டுரைகளின் தொகுப்பு. மொத்தம் 22 கட்டுரைகள் கொண்டது. 2023-ம் ஆண்டு வெளிவந்தப் புத்தகம். தேசாந்திரி பதிப்பகம் வெளியீடு செய்திருந்தார்கள்.

என்னுடைய தனிப்பட்ட வாசிப்பின் மாற்றங்களுக்கு மிகவும் முக்கியமானவர் எழுத்தாளர் எஸ்.ராமகிருஷ்ணன். தன்னை மட்டுமே தன் வாசகர்கள் வாசிக்க வேண்டும் என எழுதுகின்றவர்கள் ஒரு பக்கம். என்னை வாசிக்கின்றவர்கள் இன்னொன்றையும் வாசிக்கத் தவறக்கூடாது என நினைத்து எழுதுகிறவர்கள் இன்னொரு பக்கம். எஸ்.ராமகிருஷ்ணன் இரண்டாம் வகை எழுத்தாளர்களின் முதன்மையானவர் என சொல்லலாம்.

அவருடைய புத்தகங்களில் அவர் அறிமுகம் செய்திருக்கும் படைப்புகள் ஏராளம். தான் வாசித்ததை இன்னொரு வாசகனும் வாசிக்க வேண்டும்  என மிகுந்த சிரத்தையுடன் அவற்றை அறிமுகம் செய்திருப்பார். என்னுடைய பல நண்பர்களுக்கு அவரது புத்தகங்களை நான் பரிசாகக் கொடுப்பதற்கு அதுதான் முதன்மையான காரணம்.  வேற்று மொழியோ நம்மால் வாங்கி வாசிக்க முடியாத புத்தகமோ என எதுவாக இருந்தாலும் குறைந்தபட்சம் அதன் உள்ளடக்கத்தையும் அது ஏன் முக்கியமானது எனவும் நம்மால் இதன்வழி தெரிந்து கொள்ளமுடியும். தான் தெரிந்த கொண்ட குறைந்தபட்சத்தில் இருந்து தேங்கி நிற்பதும் அதனை அதிகப்படுத்துவதும் அவரவர் பாடு.

எஸ்.ராவின் ‘தனித்த சொற்கள்’ கட்டுரைத் தொகுப்பில்; ஆலன் பேடன், யுவான் ருல்ஃபோ, போஹுமில் ஹரபால், கேப்ரியல் கார்சியா மார்க்வெஸ், ஹெஸ்ஸே போன்ற உலக இலக்கியத்தில் முக்கியமாக கருதப்படும் படைப்பாளிகள் குறித்து எழுதியிருக்கின்றார்.  சமகால வாழ்வின் நெருக்கடிகளையும் அரசியல் சமூகப் பிரச்சனைகளையும் இலக்கியம் எப்படி பிரதிபலிக்கின்றது; அதன எவ்வாறு படைப்புகளாக மாற்றியுள்ளார்கள் என இந்தக் கட்டுரைகள் சொல்கின்றன.

‘கோமாலாவில் என்ன நடக்கிறது’ என்கிற கட்டுரையில்  மெக்சிகன் எழுத்தாளரான யுவான் ருல்ஃபோவின் ‘பெட்ரோ பராமோ’ என்னும் நாவல் குறித்த அறிமுகத்தைக் கொடுத்துள்ளார். நாவலை வாசிக்கும் முன் இந்தக் கட்டுரையை வாசிப்பது அந்நாவலை நமக்கு மேலும் நெருக்கமாக்கும்.

            ‘மார்க்வெஸின் கடைசி நாட்கள்’ கட்டுரையில் கேப்ரியல் கார்சியா மார்க்வெஸ் மறைவிற்கு பின் அவரது அந்தக் கடைசி நாட்களைப் பற்றியும் தன் குடும்பம் எப்படி எதிர்கொண்டது எனவும் அவரது மகள் புத்தகம் எழுதியுள்ளதை சொல்கிறார். எவ்வளவோ எழுத்தாளர்கள் வருகிறார்கள் போகிறார்கள் ஒரு சிலர்தான் தன் உதிரத்தையும் தன்னைப்போல எழுத வைக்கிறார்கள் அல்லது தன்னைப் பற்றி எழுத வைக்கிறார்கள். ஒருவேளை அது அவரவர் பாக்கியமாக இருக்கலாம். இந்தக் கட்டுரையின் கடைசி பத்தியில் நம்மையும் ஒருகணம் கலங்க வைக்கின்றார். மார்க்வெஸின் மகள், அவரது அஸ்தியை விமானத்தில் கொண்டு செல்லும் போது அவரின் அருகில் ஒரு பெண் மார்க்வெஸ் எழுதிய ‘தனிமையின் நூறு ஆண்டுகள்’ நாவலை வாசித்துக் கொண்டிருந்தாராம். எழுத்தாளனின் அஸ்தியும் அவன் எழுதிய படைப்பும் சந்தித்துக் கொள்ளும் இத்தருணத்தை எப்படி நாம் வகைப்படுத்துவது.

            இலக்கியம் மீது ஆர்வம் இருப்பவர்களுக்கு ‘சித்தார்த்தா’ நாவல் பரிட்சயம். ஹெர்மன் ஹெஸ்ஸே எழுதிய சித்தார்த்தன் நாவலை நானும் நண்பர்களுக்கு பரிந்துரைத்துள்ளேன். ஆனால் ஹெர்மன் ஹெஸ்ஸே தனது இலக்கில்லாத நடைப்பயணங்களை குறித்து ஒரு புத்தகம் எழுதியிருப்பதை ‘அலைந்து திரிபவனின் உலகம்’ கட்டுரை மூலம் நாம் தெரிந்து கொள்ளலாம். அந்தப் புத்தகத்தில் ஹெஸ்ஸேவின் கோட்டோவியங்களும் கவிதைகளும் இடம் பெற்றிருக்கின்றதாம். இந்தப் புத்தகத்தில் நடை பயணத்தை விரும்பும் ஜென் கவிஞர்களுக்கும் ஹெஸ்ஸேவுக்குமான பார்வை வித்தியாசங்களையும் தனக்கே உரிய பாணியில் எழுதியிருக்கிறார் கட்டுரையாசிரியர்.

            ‘கதாப்பாத்திரங்களைத் தேடுகின்றார் டிக்கன்ஸ்’ கட்டுரையில் டிக்கன்ஸ் எழுத்துகள் குறித்து பேசுகின்றார். அவரே வெளியிட்ட அவரது நாவலின் சுவாரஸ்யமான பின்னணியைப் பதிவு செய்கின்றார்.

            இப்படி உலக இலக்கியத்தின் முக்கிய படைப்பாளிகள் குறித்து அவர்களது படைப்புகள் குறித்தும் பல்வேறு தகவல்களையும் அறிமுகங்களையும் ‘தனித்த சொற்கள்’ என்னும் இந்தப் புத்தகத்தில் நாம் வாசிக்கலாம்.

            அடுத்த நாம் வாசிக்க வேண்டிய ஏதோ ஒரு படைப்பாளியையோ புத்தகத்தையோ இந்தப் புத்தகம் நமக்கு எடுத்துக் கொடுக்கின்றது. அதை நாம் என்ன செய்கிறோம் என்பதுதான் நாம் கேட்க வேண்டிய கேள்வி.

- ஜாலி,கூலி,காலி -

- ஜாலி, கூலி, காலி -

கைப்பேசியில் தமிழ் தட்டச்சு வந்த காலகட்டத்தில், தனக்கு தெரிந்த பொன்மொழிகள் பழமொழிகள் சினிமா பாடல் வரிகளை  எழுதி அதற்கு கீழ் காலை வணக்கம் மதிய வணக்கம் இரவு வணக்கம் என எழுதி பகிர்வார்கள். 

பிறகு அதையே பூக்கள், இயற்கை காட்சிகள், அழகான பெண்களின்  பின்னணி கொண்ட ஓவியங்களிலும் புகைப்படங்களிலும் எழுதி படங்களாக பகிர்ந்தார்கள்.

இப்போது கொஞ்சமும் மாற்றம் இல்லாமல் அதே மாதிரி அல்லது அதையே கவிதைகள் என்று நம்பிக்கொண்டு புத்தகங்களாக அச்சடித்துக் கொள்கிறார்கள். 

அப்படியும் அவர்களின் கவிதைகளின் கீழ், 'காலை வணக்கம்', 'மதிய, 'இரவு வணக்கம்' என்பதை போட்டுக்கொள்ளும் தைரியம் இன்னும் வரவில்லை.  

அதுவரைக்குமாவது அவர்களைப் பாராட்டலாம். 

***********

எழுதினவன் ஜாலி

அச்சடிச்சவனுக்கு கூலி

வாசிக்கிறவன் காலி...!

காலை/மாலை/மதிய/இரவு

வணக்கம் நண்பர்களே.....

#தயாஜி

வழி தப்பிய பறவைகள்

தீபத்திற்காய்ச்
சுடருக்கு நன்றி சொல்வாய்.
தீபம் கையேந்தித்
திரை மறைவில் பொறை வடிவாய்
தாங்கி நிற்பான்,
நினைந்திரு...
- ரவீந்திரநாத தாகூர்.

வாசிப்பில் 'வழி தப்பிய பறவைகள்'.
நவீந்திரநாத தாகூர் குறுங்கவிதைகள்.
பட்டு எம்.பூபதி தமிழாக்கம் செய்திருக்கிறார். கலைஞன் பதிப்பகம் வெளியிட்டுள்ளார்கள்.
1998-ல் வெளியீடு கண்ட முதல் பிரதி.

பல ஆண்டுகளுக்கு முன் ஏதோ ஒரு பழைய புத்தகக்கடையில் வாங்கி வைத்ததாய் நினைவு. சில நாட்களாக புத்தக அலமாரியை சுத்தம் செய்யும் போது கண்ணில் பட்டது.

சில வீடுகள் மாறியும் பல அட்டைபெட்டிகளில் ஏறி இறங்கியும்  தப்பி பிழைத்து இன்னமும் எங்கள் வீட்டு புத்தக அலமாரியில் தனக்கென ஓரிடத்தில் அமைதியாய் அமர்ந்திருந்தது.

இனியும் தாமதிக்கக் கூடாது என்று, உடனே வாசிக்க தொடங்கிவிட்டேன்.
வாசிக்க வாசிக்க தன்னுள் நம்மை ஈர்க்கின்றன கவிதைகள். சிலவற்றை மீண்டும் மீண்டும் வாசிக்கின்றேன்... 

#தயாஜி #புத்தகச்சிறகுகள்_புத்தகக்கடை

- 2025-இன் நான்கில் இரண்டு -

2025-ஆம் ஆண்டின்  நான்கின் இரண்டாம் பகுதியைக்  கடந்துவிட்டோம். இந்த ஆண்டில் நமக்கு கொடுக்கப்பட்ட நாட்களில் நான்கில் இரு பகுதிகள் முடிந்தன. 

முதற்பகுதியில் நான் வாசித்தவைக் குறித்து முன்னமே எழுதியிருந்தேன்; இது அதன் இரண்டாம் பகுதி. மார்ச் மாதத்தில் இருந்து ஜூன் மாதம் வரை வாசித்த புத்தகங்களைக் குறித்த சிறு பகிர்வு. 

சமீபத்திய இணைய நிகழ்ச்சி ஒன்றில் எழுத்தாளரிடம் கேள்விகள் கேட்கப்பட்டன. இளம் வாசகர் ஒருவர் அந்த எழுத்தாளர் என்ன வாசிக்கின்றார் என கேட்டார். சற்று யோசித்த எழுத்தாளர் இப்படியாக பதில் சொன்னார்.

“நான் பல வேளைகளில் பல புத்தகங்கள் வாசிப்பேன். கழிவறையில் கூட நான் புத்தகம் வைக்கிறதுக்கு இடம் வச்சிருக்கேன்…” இந்தப் பதில் அந்த இளம் வாசகருக்கு மேலும் ஆர்வத்தைத் தூண்டியிருக்க வேண்டும். அவர் திரும்பவும் கேட்டார், “சிறப்பு ஐயா.. என்னென்ன புத்தகங்கள் வாசிக்கிறீங்க..?”

அந்த எழுத்தாளரின் பதில், “அதேன் சொன்னேன்ல… இதைதான் வாசிக்கிறென்னு இல்ல..  பல புத்தகங்களைப் பல சமயத்தில் வாசிக்கிறேன்.. ஏன்னே அப்பதான் நம்மால தொடர்ந்து இந்த எழுத்துத்துறையில் இயங்க முடியும்.. இல்லைன்னா கஷ்டமாகிடும்..”

கடைசிவரை தான் என்ன வாசிக்கிறேன் என்பதை அந்த எழுத்தாளர் சொல்லவேயில்லை. 

அவருக்கு அந்தத் தயக்கம்  வர என்ன காரணமாக இருக்க வேண்டும் என்பதை தொடர்ந்து பல நாட்களாக யோசித்தேன். இதற்கெல்லாம பல நாட்கள் யோசிப்பீங்க..? என நீங்கள் கேட்கபது எனக்கும் விளங்கியது.

வாசிப்பென்பது தனிமனித செயல்பாடு. ஒரே புத்தகத்தை இருவர் வாசித்தால் இருமாதிரியான அனுபவத்தைதான் அது அவர்களுக்கு கொடுக்கும். கூட்டு வாசிப்பிலும்கூட ஒரே புத்தகம் பலருக்கு பல வித வாசிப்பு அனுபவங்களைக் கொடுக்கின்றன. அதன் இலக்கு ஒன்றை நோக்கியதாக இருந்தாலும் அதில் செல்லும் வழிகள் வெவ்வேறானவை.

தான் வாசித்ததை இன்னொருவனும் வாசித்துவிட்டால் அவனுக்கும் நமக்குமான இடைவெளி குறைந்துவிடுமே என அச்சப்படும் எழுத்தாளர்களும் இருக்கிறார்கள் என்பதை நாம் மறுப்பதற்கில்லை. ஆனால் அதன் சதவீதம் குறைவுதான். அதைத்தவிர்த்து பலரும் தனித்தனியாகவோ குழுக்களாகவோ தாங்கள் வாசித்த புத்தகங்களை தொடர்ந்து பகிர்ந்து கொண்டுதான் இருக்கிறார்கள். நானும் அவர்களில் ஒருவன்தான். 

வாசித்த புத்தகங்களைக் குறித்து பேசுவதும் பகிர்வதும் வாசிப்பின் சுவையை இரட்டிப்பாக்குகிறது. அதோடு அதைப் பற்றி பேசும்போது அது மேலும் சுவையாகிறது.

இவ்வருடம் தொடர்ங்கி மார்ச் மாதம் வரை 17 புத்தகங்களை வாசித்திருந்தேன். அதுபற்றியப் பகிர்வை சிறு குறிப்புடன் எழுதியிருந்தான். 

இப்பதிவு ஏப்ரல் மாதம் முதல் ஜூன் மாதம் வரை வாசித்த புத்தகங்கள் பற்றியதாக இருக்கும்.

நாவல்கள். மாதம் ஒரு நாவல் என்கிற எனது திட்டமிடலில் வந்திருக்கும் மூன்று நாவல்கள்.

18. அஹில்லா – நிலவின் 28 தோற்றங்கள்

- இது சூஃபி நாவல். முஅதஸ் மத்தர் எழுதி ரமீஸ் பிலாலி தமிழாக்கம் செய்திருந்தார். அருங்காட்சியகத்தில் வேலை செய்யும் வாய் பேச முடியாத மனிதனி எதிர்கொள்ளும் சிக்கலைச் சொல்லும் நாவல். ஒருபக்கம் அங்குள்ள ஒரு பொக்கிஷயத்தை திருடவேண்டிய நிர்பந்தம் இன்னொரு பக்கம் அங்கு அவனுக்கு ஏற்படும் காதல். அந்த பொக்கிஷயம் என்ன என்பது நாவலில் இன்னொரு பகுதியாக விரிந்து செல்லும். துப்பறியும் நாவலை வாசிக்க விருப்பம் உள்ளவர்கள் இந்நாவலை வாசிக்கலாம். அவர்களுக்கு ஒரு மாறுபட்ட வாசிப்பு அனுபவத்தைக் கொடுக்கும். ஆனால் இந்நாவலின் முடிவை என்னை ஈர்க்கவில்லை.

19. சித்தார்த்தன்

- ஹெர்மன் ஹெஸ்ஸே எழுதிய திருலோக சீதாராம் தமிழாக்கம் செய்திருக்கும் நாவல். நீங்கள் ஒருமுறையேனும் இந்நாவலை வாசித்துவிடுங்கள். தாமதமாக இந்த நாவலை வாசித்துவிட்ட உணர்வை இந்நாவல் எனக்கு கொடுத்தது. வாழ்வின் அர்த்தம் எப்படி ஆளுக்கு ஆள் மாறுபடுகின்றது என்பதைத் தொடர்ந்து மனித மனம் எப்படியெல்லாம் நம்மை அலைக்கழிக்கும் என்பதை ரொம்பவும் ஆழகமாக இந்நாவலில் சொல்லப்பட்டிருக்கும்.

20. ஆலிஸின் அற்புத உலகம்

- லூயி கரோல் எழுதிய இந்நாவலை எஸ்.ராமகிருஷ்ணன் தமிழாக்கம் செய்திருக்கிறார். உலக புகழ்பெற்ற இந்நாவல் திரைப்படமாகவும் வந்திருக்கிறது. கற்பனையின் ஆழம் எதுவரை செல்லும் என நமக்கு காட்டும் நாவல்களில் இதுவும் ஒன்று.

கவிதைகள்

21. காட்டோவியம்

- ஜீ.முருகனின் கவிதைத்தொகுப்பு. எனக்கு அவரது சிறுகதைகளைப் பிடிக்கும் பல கதைகளை வாசித்து நண்பர்களுடன் உரையாடியுள்ளேன். முதன் முறையாக அவரது கவிதைகளை வாசிக்கின்றேன். பெரும்பாலான கவிதைகள் வாசகனோடு உரையாடுவதாக அமைந்திருந்தன.

சிறுகதைகள்/குறுங்கதைகள்

22. தீர்மானம்

- எழுத்தாளர் ரிஸ்வான் ராஜாவின் சிறுகதைகள். 11 சிறுகதைகள் அடங்கிய தொகுப்பு இது. இதில் சில கதைகளைக் குறித்து விரிவாக பேச வேண்டும் என விரும்புகின்றேன். முழுமையான ஒரு கட்டுரையுடன் வருகிறேன்.

23.  ஆப்பிள் துப்பாக்கி பெட்ரோல் நிலையம்

- த. அரவிந்தனின் குறுங்கதைகள். 64 குறுங்கதைகள் அடங்கிய தொகுப்பு. சில கதைகளை இருமுறைக்கும் அதிகமாக வாசித்த பின்னரே புலப்பட்டது. ஏமாற்றாத குறுங்கதைகள் இவை. பலவிதமான குறுங்கதைகளை வாசித்த அனுபவத்தைக் கொடுத்தது.

கட்டுரைகள்

24. புனைநிலை உரைத்தல்

- மலேசிய எழுத்தாளர்கள் 4 பேரின் படைப்புலகம் பற்றிய விமர்சனக்கட்டுரை தொகுப்பு.

அடுத்து 'மாதம் ஒரு மலேசிய புத்தகம்' தொடருக்காக வாசித்தவை (சில மீள்வாசிப்பு)

25. நாகம்மாளின் மனக்குறிப்புகள்

- மனோகரன் கிருஷ்ணன் சிறுகதைகள்

26. மா.சண்முகசிவா சிறுகதைகள்

- எழுத்தாளரும் மருத்துவருமான மா.சண்முகசிவாவின் சிறுகதைகள்

27. மண்புழுக்கள்

- சீ.முத்துசாமியின் நாவல்

இந்த மூன்று புத்தகங்கள் குறித்தும் விரிவான அறிமுகத்தை நடுகல்.காமில் எழுதியுள்ளேன். நண்பர்கள் அங்கு சென்று வாசிக்கலாம்.

ஏப்ரல் மாதம் தொடங்கி ஜூன் மாதம் வரை வாசித்த புத்தகங்கள் இவை. வாசிப்பில் எத்தனை புத்தகங்களை வாசிக்கின்றோம் என்பதை விட 'வாசிக்கிறோமா?' என்கிற கேள்விதான் முக்கியம் என நம்புகின்றவன் நான். தினம் ஒரு பக்கத்தை புரிந்து ரசித்து வாசித்தாலும் கூட நாம் வாசகர்கள்தான்.   

இந்த ஆண்டின் இரண்டாம் பகுதியை முடித்து மூன்றாம் பகுதிக்குள் நுழைகின்றோம். அடுத்ததாய் ஜூலை ஆகஸ்ட் செப்டம்பர்  மாதங்களில் வாசிப்பின் ருசி என்னவாக அமைகிறது என பின்னர்தான் தெரியவரும். வாசிப்போம்.

உங்களுக்கு எப்போதும் என் அன்பு..

- எழுதவே எழுதுகிறேன் -

இளம்கவி இளமாறனைச் சந்தித்தேன்.

வீட்டிற்கு வந்திருந்தார். கவிதைகள் எழுதுவதிலும் அது குறித்து பேசுவதிலும் ஆர்வம் உள்ள இளைஞர்களில் ஒருவர்.

தொடர்ந்து இங்கு நடக்கும் பல மரபு கவிதைகள் போட்டிகளுக்கு பங்கெடுத்து கொண்டிருப்பவர். அதோடு நவீன கவிதைகள் எழுதவும் முயற்சித்து வருகிறார்.

சில சமயங்களில் அவர் எழுதிப் பகிரும் கவிதைகள் ‘அடடே நல்லாருக்கே..’ எனவும் நம்மை சொல்ல வைத்துவிடுகிறது.

தொடர்ந்து எழுதுவதின் மூலமே அவர் அவருக்கான இடத்தை அடைவார் என நம்புகிறேன். இதுதான் இயல்பு. அதை அவர் தவறவிட்டால் 'ஒருகாலத்தில் நல்லா

எழுதுகிட்டு இருந்த பையன்...!' என்ற அடைமொழி அமைந்துவிடும்.

எனக்கு பிடித்த கவிஞர்களில் ஒருவரான கவிஞர் இந்திரனின் கவிதைகள் குறைத்து எழுதப்பட்ட ‘இந்திரஜாலம்’ என்னும் புத்தகத்தை அவருக்கு பரிசளித்தேன்.

அந்தப் புத்தகத்தின் வழி இந்தரனின் கவிதைகளை வாசிப்பதோடு அவற்றை புரிந்து கொள்ளும் பயிற்சியும் அவருக்கு கிடைக்கும். அதற்கு ஏற்றவாரே அந்தக் கட்டுரைகளை நா.வே.அருள் எழுதியிருக்கிறார்.

எழுதுவதில் ஆர்வம் இருப்பவர்களிடம் தம்முடைய படைப்புகளை வாசித்து தன்னைப் பற்றி பேசவைத்து தன்னுடனேயே இருக்க வைப்பதில் எனக்கு விருப்பம் இல்லை. (என் எழுத்துகளை வாசிப்பதும் அதைப்பற்றி பேசுவதும் அவரவர் விருப்பம்.) அப்படி செய்வது அந்த இளம் படைப்பாளிக்கு அந்தந்த நேர விளம்பரத்தையும் ஆர்வத்தையும் கொடுக்குமே தவிர; அதைத்தாண்டி அவர்களின் தனிப்பட்ட எழுத்திற்கு நீண்ட கால பயனை கொடுக்காது. கூட்டத்தில் இருந்தாலும் தனித்திருக்கும் வாய்ப்பு மிகச்சில படைப்பாளிகளுக்குத்தான் வாய்க்கின்றது. மற்றவர்களுக்கு இன்ன எழுத்தாளரின் நண்பர்/குழு, இந்த எழுத்தாளரின் வாசகர் என்கிற சிறு வட்டத்திலேயே சுருங்கி விடுகிறது.

தங்களை பெரிய வாசகச்சின்னமாக ஜொலிப்பவர்களின் பலர் ஒரே எழுத்தாளரின் வாசகராகவும் அவர்களுக்கான புகழ் மாலையை  தங்களின் நேரத்தால் தொடுக்கும் சேவகராகவும் இருந்துவிடுகிறார்கள். அதை குறைசொல்ல ஒன்றுமில்லைதான். ஆனால் குறைந்தபட்சம் அவர்கள் புகழ்பாடும் எழுத்தாளர் வாசிப்பதை இவர்களும் வாசிக்கிறார்களா என்று பார்த்தால் ‘ஹுஹும்’ அந்த எழுத்தாளரைத் தவிர மற்ற எதையும் வாசிப்பதுமில்லை தெரிந்து கொள்வதுமில்லை. அது பெரிய தவறில்லைதான். அதுவும் எதுவரை. பொதுவில் உங்கள் வாசிப்பை நீங்கள் கொண்டு வந்து வைக்கும்வரை. அவர்களும் தங்களை பின் தொடரும் இளம் எழுத்தாளர்களுக்கு; அவர்கள் வாசிக்க எதையும்  அறிமுகம் செய்வதில்லை. அதேபோல எதை வாசித்தால் அவர்கள் தன்னை விட்டு விலகிவிடுவார்கள் என்பதை அறிந்து அவர்களை அதனிடம் நெருங்குவதில்லை.

இங்கு சில இளம் எழுத்தாளர் தாங்கள் வாசிக்கும் எழுத்தாளர்களின் ‘பிழை திருத்துனர்களாகவே’ மாறிவிட்டார்கள். அந்த எழுத்தாளர் எழுதும் கதைகளை இவர்களுக்கு அனுப்பிவிட்டு “உங்கள் பார்வைக்கு மட்டும், பிழைகளோ குழப்பங்களோ இருந்தால் சொல்லவும். மகிழ்ச்சியுடன் ஏற்றுக்கொள்வேன்’ என்கிறார்கள். இதே செய்தியை (தாழ்மையான விண்ணப்பத்தை) ஒருவருக்கு மட்டுமல்ல பலருக்கும் அனுப்புகிறார்கள். பிழைகளில் இருந்து அவர் எழுதிய புனைவுகள் வரை இருக்கும் பல சிக்கல்களை பலபேர் சொல்லக்கேட்டு அதற்கான திருத்தங்களையும் அவர்களிடமே கேட்டு திருத்தி தங்கள் பிரசுரிக்க அனுப்புகிறார்கள். (அப்படி செறிவாக்கம் செய்வது படைப்பிற்கு நல்லதுதான் ஆனால் ஒரு படைப்பை செறிவாக்கம் செய்வதற்கும் ஒன்றுமில்லாததை செறிவாக்கம் செய்வதாகச் சொல்லி அடுத்தவர்களை அந்தப் புனைவை எழுத வைப்பது நல்லா என்ன?) அதுவே நாளை புத்தகமாக பிரசுரமாகும் போதும் அதனைத் திருத்திய செறிவாக்கம் செய்த யாரின் பெயருமே அந்தப் புத்தகத்தில் இருக்காது. ஏனேனில் அந்தப் புனைவு அந்த எழுத்தாளரின் நூறு சதவித திறமையாம்.

இந்த நேரத்தில் இன்னொன்றையும் சொல்லவேண்டும். அதுதான் நான் சொல்ல வந்ததை முழுமையாக்கும்.

நண்பராக இருந்தாலும் சரி வாசகராக இருந்தாலும் சரி அல்லது முன்னால் நண்பராக வாசகராக இருந்தாலும் சரி, ஒரு சிலரால் மட்டுமே தாங்கள் வாசித்த படைப்பின் குறைநிறைகளை எந்தத் தடையுமின்றி எழுதவும் பகிரவும் முடிகிறது. அவர்களால் ஒரு படைப்பை அந்தப் படைப்பாளியிடம் இருந்து விலக்கி முழுக்கவும் அந்தப் படைப்பையொட்டி விவாதிக்க முடிகிறது.

அதனை ஒருபக்கம் விடுவோம், இன்றைய இளம் தலைமுறை எழுதுவதில் ஆர்வமாக இருக்கிறார்கள். அதனை அவரவர் தன் சுய இலாபத்திற்காய்ப் பயன்படுத்தியும் கொள்கிறார்கள். வாசிக்க ஆரம்பித்தாலே போதும் இதுபோன்ற சூழ்ச்சிகளில் இருந்து இவர்கள் தப்பித்துக்கொள்ளலாம்.

எழுத வேண்டும் என இவர்களிடம் வருபவர்கள், இலக்கிய நிகழ்ச்சிகளை ஏற்பாடு செய்பவர்களாகவும், இவர்கள் நடத்தும் நிகழ்ச்சிகளுக்கு ஸ்பான்ஸர் வாங்கி கொடுப்பவர்களாகவும், கல்லூரி பல்கலைக்கழக மாணவர்களாக இருந்தால் இலவசமாக நிகழ்ச்சிக்கான இடத்தை ஏற்பாடு செய்பவராகவும், வி.ஐ.பிகளை மரியாதையோடு மேடை ஏற்றி இறக்குபவர்களாகவும் இப்படி பல 'களாகவும்' ஆகிவிடுகிறார்களே தவிர ஒருபோதும் எழுத்தாளர்களாக ஆவதில்லை.

இதில் யாரை குறை சொல்ல?

வாசிக்காமலேயே எழுத வேண்டும் என களம் இறங்குவதில் இருந்துதானே இந்த இலக்கிய ஸ்கேம் தொடங்குகிறது.

எழுத்தாளர் சித்துராஜ் பொன்ராஜுடன் சந்திப்பு

சமீபத்தில் சிங்கையில் இருந்து வேலை நிமித்தமாக மலேசிய வந்திருந்த எழுத்தாளரும் அண்ணனுமான சித்துராஜ் பொன்ராஜ் அவர்களைச் சந்திக்கும் வாய்ப்பு கிடைத்தது.

பார்க்க வாய்ப்பு கிடைக்கும் எழுத்தாளர்களை முடிந்தவரை நான் தவறவிடுவதில்லை. பிரிக்பீல்ட்ஸில் சந்திக்க முடிவெடுத்தோம்.
எழுத்தாளரைச் சந்திக்க நம்மூர் எழுத்தாளர்களையும் அழைத்துச் சென்றேன். எழுத்தாளர் ஸ்ரீகாந்தனும் எழுத்தாளர் பிருத்விராஜூம் வந்திருந்தார்கள்.

இரவு வரை பேசினோம். எங்கள் உரையாடல் இலக்கியம் குறித்தே அமைந்திருந்தது. என்னிடம் இருந்த சித்துராஜ் புத்தகங்களை எடுத்துச் சென்றிருந்தேன். அவரிடம் கையொப்பம் வாங்கி கொண்டேன்.. நான் எழுதிய புத்தகங்களை அவருக்கு கொடுத்தேன். என் புத்தகங்களின் ஒன்றை இவருக்கு சமர்ப்பணம் செய்திருந்தேன்.

சில ஆண்டுகளுக்கு முன் குறுங்கதைகளை முகநூலில் எழுதி பகிர்ந்த சமயங்களின் குறிப்பிட்ட சிலரே அதனை கவனித்தார்கள் பின்னரே அது பெரிய வாசக பரப்பை அடைந்தது.

நான் குறுங்கதைகளை எழுதி பகிர்ந்த ஆரம்ப கட்டத்தில் தொடர்ந்து என் கதைகளை வாசித்து அவரின் கருத்துகளைப் பகிர்ந்து கொண்டார். அவரது வலைப்பக்கத்திலும் என் கதைகளைக் குறித்து அறிமுக கட்டுரையை எழுதியிருந்தார்.

குறுங்கதைகளைத் தொகுத்து புத்தகமாக்கும் சமயத்தில் அவரிடமே முன்னுரையைக் கேட்டிருந்தேன். மீண்டும் ஒருமுறை என் குறுங்கதைகளை வாசித்து நல்லதொரு கட்டுரையாகவே எழுதி கொடுத்திருந்தார்.
இளம் படைப்பாளிக்கு அவர் கொடுத்த ஊக்கம், குறுங்கதைகள் மீதான என் ஆர்வத்தை அதிகப்படுத்தியது.

இப்போதுதான் அவரை சந்திக்கும் வாய்ப்பு கிடைத்தது. புத்தகங்களை அவரிடம் கொடுத்தேன்.

எங்கள் உரையாடலும் , இலக்கியம் மீதான எங்கள் கருத்துகளும் எங்களின் அன்றைய பொழுதை பயனுள்ளதாக்கியது.

எழுத்தாளர் பிருத்விராஜு, எங்களை அழகாய்ப் படம் பிடித்திருந்தார்.

#தயாஜி #புத்தகச்சிறகுகள்_புத்தகக்கடை

- மனமலர் -

- மனமலர் -

நீண்ட நாட்களுக்கு பிறகான மலர்தல்.

சிறுசிறு விதைகளாய் விழுந்ததில் இருந்து தான் மட்டும் தப்பிப் பிழைத்ததில்  ஒன்று இந்த நித்திய கல்யாணி. 

அதன் மலர் போல அவள் பெயரும் அழகானது. வசீகரமானது. முதலில் இவளை நித்திய கன்னி என்றே புரிந்து கொண்டிருந்தேன்.  வயதின் காரணமாகவும் அது கொடுக்கும் கிளர்ச்சியின் காரணமாகவும் இருக்கலாம். இனி இல்லை, ஏனெனில் நாங்கள் வளர்ந்துவிட்டோம். 

முதல் பூ என்பதால் மட்டுமே, அவள் மலர்த்தும்வரை காத்திருந்து அந்த மலரை பார்க்கிறேன். இந்த இரவில் மெல்லிய மழையில் நிலவற்ற குறையைத் தீர்க்கிறாள்.

ஏதாவது ஓர் உயிரை நம் வாழ்நாள் முழுக்க உடன் வைத்துக்கொண்டே இருக்க வேண்டும். மனம் துவண்டழும் போதெல்லாம் ஆறுதலுக்கு அவை முன் வந்து நிற்கும்.

என்னைப் பார்க்காத போதெல்லாம் வாடி வதங்கும் செடிகளைவிட்டு, எனக்காக மலர்விடும் அரும்புகளைவிட்டு, என்னைப் பார்த்து தலையசைக்கும் அதன் குறும்புகளைவிட்டு, என்னால் எப்படி போக முடியும். நீங்கள் வெறும் செடிகளா என்ன?

என் சகாக்கள் அல்லவா...

ஏனோ எனக்கு நண்பர்கள் அதிகமில்லை. ஆனால் எந்த / எதன் நட்பில் இருந்தும் நான்  ஒருபோதும் தனித்துவிடப்படவில்லை.

மண்படும் எல்லாமும், காற்றணைக்கும் ஒவ்வொன்றும் என்னை அதனதன் சகாவாகவே பார்க்கின்றன...

#தயாஜி #புத்தகச்சிறகுகள்_புத்தகக்கடை

- 2025-இன் நான்கிலொன்று -

2025-ஆம் ஆண்டின் சிறுபகுதியைக் கடந்துவிட்டோம். இந்த ஆண்டில் நமக்கு கொடுக்கப்பட்ட நாட்களில் நான்கில் ஒரு பகுதி முடிந்தது. 

கடந்த மூன்று மாதங்களில் பல சிக்கல்களுக்கு மத்தியில் வழக்கம் போல வாசிக்கவும் முடிந்தது.

திட்டமிட்டபடி மாதம் ஒரு நாவலென மூன்றாவது நாவலையும் வாசித்து முடித்தேன். அதோடு நடுகல்.காமிற்கு எழுதும் மாதாந்திர தொடரான 'மாதம் ஒரு மலேசிய புத்தகத்திற்காக' மூன்று புத்தகங்களை வாசித்திருந்தேன். தொடர்ந்து இத்தொடருக்காக ஒன்பது புத்தகங்களை வாசிக்கவும் சிலவற்றை மீள்வாசிப்பு செய்யவும் வேண்டியுள்ளது.

இன்றையச் சூழலில் ஒரு வாசகனுக்கும் ஓர் எழுத்தாளனுக்கும் ஊக்கமும் உற்சாகமும் கொடுக்க கூடிய வார்த்தைகள் ரொம்பவும் முக்கியம். அதைவிட முக்கியம் முதற்கட்டமாக அந்த வார்த்தைகள் நம்மிடம் இருந்தே நமக்கு வரவேண்டும்.

என்னை நான் உற்சாகப்படுத்தும் இந்த நேரத்தில் நீங்களும் உற்சாகம் கொள்வீர்கள் என்பதற்காக இந்தப் பதிவில் இதுவரையில் வாசித்த புத்தகங்களைப் பகிர்கின்றேன். நீங்களும் இதுவரையில் வாசித்ததைப் பகிருங்கள். நம் இரு தரப்பிற்குமான  உரையாடல் அதன் வழி தொடரட்டும்.

எனது இந்த பகிர்வில் ஒவ்வொரு புத்தகத்திற்கும் என் வாசிப்பையொட்டிய சிறு குறிப்பையும் சிலவரிகளில் எழுதுகிறேன். 

எனக்கு உதவியாகவும் உற்சாகமாகவும் அமைந்த, நான் வாசித்த நண்பர்களின் புத்தக அறிமுகம் போல எனது இச்சிறு குறிப்பும் ஏதாவது ஒரு வகையில் புத்தகங்களை நேசிக்கும் உங்களுக்கும் பயனாய் இருக்கும் என நம்புகின்றேன்.

மாதம் ஒரு நாவல் வாசிப்பு திட்டத்தில் வாசித்தவை:-

1. காதலின் நாற்பது விதிகள்.

- ரொம்பவும் பிடித்த நாவல்களில் இதுவும் அடங்கியது. நாவல் நகர்ந்த விதமும் நாவலுக்குள் நாவலாக விரிந்து சென்ற கதைகளும் கதாப்பத்திரங்களின் குரல்களும் வாசிப்பில் கவர்ந்தது. ரூமி என்னும் மகாகவி சமய போதகராக இருந்து கவிஞராக மாறும் மாற்றம் கவிதையாகச் சொல்லப்பட்டுள்ளது.

2. ஜின்களின் ஆசான்.

- வித்தியாசமான வாசிப்பு அனுபவத்தைக் கொடுக்கக்கூடிய கதை. சுவாரஸ்யமாக சொல்லப்பட்ட நாவல். துப்பறியும் பாணியில் ஒரு ஆன்மீக பயணம் என இதனைச் சொல்லலாம். ஜின் தேடி மனிதர்கள் போகிறார்கள். ஜின்களின் அரசனை சந்திக்கின்றார்கள். அதன் பின் நடந்தது என்ன என்பதை மீண்டும் நினைவுக்கூர்கிறது இந்நாவல்.

3. விசித்திரங்களின் புத்தகம்.

- காணாமல் போன நூலகரைத் தேடுவதில் தொடங்கிய கதை, மெல்ல மெல்ல அத்தேடல் அகத்தேடலாய் மாறி தனக்கான ஆன்மீக குருவைத் தேடும்படி பரிணமிக்கும் கதை. தன் ஆன்மீக பயணத்திற்கான சரியா குருவை நாயகன் கண்டடைந்தானா இல்லையா என்பது மீதிக்கதை.

இம்மூன்று நாவல்களையும் ரமீஸ் பிலாலி மொழிபெயர்த்துள்ளார். மூன்றுமே சூஃபி நாவல்கள் என்பது இந்த நாவல் வாசிப்பிற்கான என் உந்துதல். அடுத்த வாசிப்பிற்கான சில புத்தகங்களை இதன் அடிப்படையிலேயே தேர்வு செய்துள்ளேன்.

அடுத்ததாய்க் கவிதைகள்

4.  யாருமற்ற நிழல் - தேவதச்சன்

5. என் ஓவியம் உங்கள் கண்காட்சி - கல்யாண்ஜி

6. வாழ்க்கைக்கு வெளியில் பேசுதல் - இசை

7. கடல் காற்று கங்குல் - மின்ஹா

8. நாங்கூழ் - முன்ஹா

9. தாகங்கொண்ட மீனொன்று - ரூமி (என்.சத்தியமூர்த்தியின் தமிழாக்கம்)

10. ரூமியின் வைரங்கள் - ரமீஸ் பிலாலியின் தமிழாக்கம்

இந்தக் கவிதைத் தொகுப்புகள் ஒவ்வொன்றுமே முக்கியமானவைதான். அதன் மொழிக்கும்  அது சொல்ல எடுத்துக்கொண்ட கவிக்கும் அவை முக்கியத்துவம் பெறுகின்றன. தொடர்ந்து கவிதைகளை எழுதுகிறேன். இந்தக் கவிதைத் தொகுப்புகள் தனிப்பட்ட முறையும் எனக்கு உதவின. மூத்த படைப்பாளி இளம் படைப்பாளி மொழிபெயர்ப்பு என்ற மூன்று தரப்புகளில் இருந்து வாசித்த இந்தக் கவிதைகள் வாசிப்பின் இன்பத்தைக் கூட்டின.

அடுத்ததாய்க் கட்டுரைகள்/கதைகள்

11. கவிதை: இன்று முதல் அன்று வரை - வண்ணநிலவன்

- 20 தமிழ்க் கவிஞர்களின் கவிதை உலகைக் குறித்த அறிமுகமும் விமர்சனமும் அடங்கிய தொகுப்பு. சிலரை அறிமுகம் செய்தததோடு பல கவிஞர்களைப் புரிந்து கொள்ளவும் உதவியது.

12. என்றார் சூஃபி - ரமீஸ் பிலாலி

- சூஃபிசத்தைச் சொல்லும் குரு சிஷ்ய உரையாடலாக இந்தப் புத்தகத்தை எழுதியிருக்கிறார் எழுத்தாளர்.  ஒவ்வொன்றும் ஓரிரு பக்கங்களில் முடிந்து நம் சிந்தனையில் இன்னொரு பக்கத்தை எழுதிச்செல்கின்றன.

13. பண வாசம் - குரு மித்ரேஷிவா

- எது செல்வம், எப்படி அடைவது, அதனை அடைவதற்கான மனநிலை என்னவாக இருக்க வேண்டும் என்பதற்கான அடிப்படை கருத்துகளைச் சொல்லும் புத்தகம். 

அடுத்து 'மாதம் ஒரு மலேசிய புத்தகம்' தொடருக்காக வாசித்தவை

14. ஆதி.இராஜகுமாரன் சிறுகதைகள்

- ஜனவரியில் இந்தப் புத்தகத்தில்தான் தொடரை தொடங்கினேன்.

15. அகப் பறவை - பூங்குழலி வீரன்

- எனக்கு பிடித்த மலேசிய கவிஞர்களில் ஒருவர்.

16. ஜீவானந்தன் சிறுகதைகள்

- தொடர்பு துறையிலும் எழுத்திலும் நான் என் முன்னோடிகளாக நினைப்பவர்களில் ஒருவர். 

17. பின்னர் அப்பறவை மீண்டும் திரும்பியது - பா.அ.சிவம்

- மொழிபெயர்ப்பு கவிதைகள்

- என்றும் நம் மனதைவிட்டு நீங்கா கவிஞர் பா.அ.சிவத்தின் எழுத்துகளுக்கு என் அன்பு

இந்த நான்கு மலேசிய புத்தகங்கள் குறித்த விரிவான அறிமுகத்தை நடுகல்.காமில் எழுதியுள்ளேன். நண்பர்கள் அங்கு சென்று வாசிக்கலாம்.

மார்ச் மாதம் வரை வாசித்த புத்தகங்கள் இவை. வாசிப்பில் எத்தனை புத்தகங்களை வாசிக்கின்றோம் என்பதை விட 'வாசிக்கிறோமா?' என்கிற கேள்விதான் முக்கியம் என நம்புகின்றவன் நான். தினம் ஒரு பக்கத்தை புரிந்து ரசித்து வாசித்தாலும் கூட நாம் வாசகர்கள்தான். 

இந்த ஆண்டின் முதல் பகுதியை முடித்து இரண்டாம் பகுதிக்குள் நுழைகின்றோம். அடுத்த மூன்று மாதங்களில் வாசிப்பின் ருசி என்னவாக அமைகிறது என பின்னர்தான் தெரியவரும். வாசிப்போம்.

உங்களுக்கு எப்போதும் என் அன்பு...

புத்தாண்டில் புதிய தொடர்

 

புத்தாண்டின் புதிய உற்சாகம் என சொல்லாமல் வேறென்ன சொல்ல முடியும்...

நடுகல்.காம் இணைய இதழுக்கு 'மாதம் ஒரு மலேசிய புத்தகம்' என்ற மதாந்திர தொடரை எழுதுகிறேன்.

சில ஆண்டுகளுக்கு முன்னமே என் வலைப்பூவிலும் முகநூலிலும் இந்தத் தலைப்பில் எழுத தொடங்கி;  தொடராமல் போன தொடர் இது... 

அதற்கான குறிப்புகளையும் புத்தகங்களை மீள்வாசிப்பு செய்வதற்கான நேரம் இப்போது அமைந்துள்ளது.

இம்முறை இத்தொடரை எழுதுவதற்கான தகுந்த இடம் கிடைத்திருக்கிறது. இனி திட்டமிட்டபடி இதனை முழுமையாக்கலாம்.

நான் வாசித்த/வாசிக்கும் மலேசிய புத்தகங்கள் குறித்த என் வாசிப்பு அனுபவத்தை இனி ஒவ்வொரு மாதமும் உங்களுடன் பகிர்ந்து கொள்வேன்.

இதுதான் இப்புத்தாண்டில் உங்களுக்கு நான் கொடுக்கும் பரிசு. அதனை வாசிப்பதுதான் நீங்கள் எனக்கு கொடுக்கும் பரிசு. இவ்வாண்டு முழுக்க நாம் பரிசுகளைப் பரிமாறிக்கொள்ளவிருக்கின்றோம். மகிழ்ந்திருப்போம்

அன்புடன் தயாஜி.

வாசிக்க இணைப்பு 👉

https://nadukal.in/%e0%ae%ae%e0%ae%be%e0%ae%a4%e0%ae%ae%e0%af%8d-%e0%ae%92%e0%ae%b0%e0%af%81-%e0%ae%ae%e0%ae%b2%e0%af%87%e0%ae%9a%e0%ae%bf%e0%ae%af-%e0%ae%aa%e0%af%81%e0%ae%a4%e0%af%8d%e0%ae%a4%e0%ae%95%e0%ae%ae/

புத்தாண்டின் முதல் வாசிப்பு

 

பிறந்திருக்கும் இந்தப் புத்தாண்டில் வாசிக்க ஆரம்பித்திருக்கும் புத்தகம். எலிஃப் ஷ்ஃபாக் எழுதி ரமீஸ் பிலாலி மொழியாக்கம் செய்த;
'காதலின் நாற்பது விதிகள்'
Tamil translation of The Forty Rules Of Love.

"பிரபஞ்சம் கதைகளால் ஆனது, அணுக்களால் அல்ல...." நாவலில் வாசித்த முதல் வாக்கியம்.

இந்த நாளை மட்டுமல்ல, இவ்வாண்டின் இறுதிநாள் வரை கொண்டாடுவதற்கு வேறென்ன வேண்டும்....
நல்லத் தொடக்கம்தானே💙

அன்புடன்
#தயாஜி #புத்தகச்சிறகுகள்_புத்தகக்கடை #வெள்ளைரோஜா_பதிப்பகம்

2024-ல் வாசித்த புத்தகங்கள்

 

ஒவ்வொரு ஆண்டும் நான் வாசித்த புத்தகங்களை எண்ணிக்கையிட்டு பகிரும் போது, இதைவிட அதிகம் வாசித்தவர்களின் புத்தக பட்டியலைப் பார்க்கும் போதும் கொஞ்சம் வெட்கப்படுவதோடு அடுத்த ஆண்டு இன்னும் அதிகமான புத்தகங்களை நம்மால் வாசிக்க முடியும் என்கிற உந்துதலையும் பெறுகின்றேன்.

ஆண்டொன்றுக்கு குறைந்தபட்சம் 50 புத்தகங்களைக் கூட வாசிக்க முடியவில்லையா என்னை நானே திட்டிகொண்டாலும், அந்த எண்ணிக்கையை தொடுவதற்கான அத்தனை முயற்சிகளையும் எடுக்கவும் செய்கின்றேன்.

வெறுமனே வாசிக்கிறேன் என இல்லாமல், முடிந்தவரை தேர்ந்தெடுத்து வாசிக்கிறேன். வாசித்ததையொட்டி பதிவு செய்வதோடு இன்னொரு வாசகனுக்கு அறிமுகமும் செய்கிறேன்.

இது கடந்த ஆண்டில்  (2024) 

நான் வாசித்த புத்தகங்கள்..

நாவல்கள்

1.   தாரா – ம.நவீன்

2.   கரிப்புத் துளிகள் – அ.பாண்டியன்

3.   கையறு – கோ.புண்ணியவான்

4.   ஆழம் – சீ.முத்துசாமி

5.   அவன் காட்டை வென்றான் – கேசவ ரெட்டி (தமிழாக்கம் ஏ.ஜி.எத்திராஜுலு)

6.   பாய்மரக்கப்பல் – பாவண்ணன்

7.   கிழவனும் கடலும் – எர்னெஸ்ட் ஹெமிங்வே (தமிழாக்கம் எம்.எஸ்)

8.   பிறிதொரு நாள் – ரெ.விஜயலெட்சுமி

9.   பனியரசி – ஹன்ஸ் கிறிஸ்டியன் ஆண்டர்சன் (தமிழாக்கம் சூ.ம.ஜெயசீலன்)

10. அம்மா வந்தாள் – தி.ஜானகிராமன்

11. வாடிவாசல் – சி.சு.செல்லப்பா

12. வாழும் மாமலை – அமிதாவ் கோஷ் (தமிழாக்கம் கண்ணன்)

கவிதைகள்

13. புன்னகைக்கும் பிரபஞ்சம் – கபீர் (தமிழாக்கம் செங்கதிர்)

14. மங்கிய நீலப் புள்ளி – சந்துரு

15. நான்சென்ஸ் – நாச்சியாள் சுகந்தி

16. வாடியது கொக்கு – ஹைக்கூ கவிதைகள்

17. அகப்பறவை – பூங்குழலி வீரன்

18. துப்பாக்கிக்கு மூளை இல்லை – எம்.ஏ.நுஃமான்

19. என் பெயர் ஜிப்சி – நக்கீரன்

20. குஞ்ஞுண்ணி கவிதைகள் (தமிழாக்கம் பா.ஆனந்தகுமார்)

21. நீராலானது – மனுஷ்ய புத்திரன்

22. ஒரு இரவில் 21 சென்டிமீட்டர் மழை பெய்தது – முகுந்த் நாகராஜன்

23. உடல் பச்சை வானம் – அனார்

சிறுகதைகள்

24. தேவதைகளற்ற வீடு – கே.பாலமுருகன்

25. முரண் – ந.பச்சைபாலன்

26. இளந்தமிழன் சிறுகதைகள் – இளந்தமிழன்

27. மிட்டாய்க் கதைகள் – கலீல் கிப்ரான் (தமிழாக்கம் என்.சொக்கன்)

28. ஜென் கதைகள் – கி.அ.சச்சிதானந்தம்

கட்டுரைகள்/பொது

29. இலக்கியமும் இலக்கியவாதிகளும் – வண்ணநிலவன்

30. படிப்பது சுகமே – வெ.இறையன்பு

31. எப்போதும் வாழும் கோடை – மனுஷ்ய புத்திரன்

32. மேடைப் பேச்சின் பொன்விதிகள் – செல்வேந்திரன்

33. கதை டூ திரைக்கதை – ஜா.தீபா

34. எஸ்.ராமகிருஷ்ணன் நேர்காணல்கள்

35. எழுத்தாளராக இருப்பது எப்படி? – ஆர்.அபிலாஷ்

36. சின்னஞ்சிறு பழக்கங்கள் – ஜேம்ஸ் கிளியர் (தமிழாக்கம் நாககலட்சுமி சண்முகம்)

பிறமொழி/ஆங்கிலம்

37. How to enjoy your life and your job – Dale Carnegie

38. The Art of Public Speaking – Dale Carnegie

39. On Writing Well – William Zinseer

40. Surrounded by Setback – Thomas Erikson