மூடாத
ஜன்னல் ஓரத்தில்
அமர்ந்தபடி
கவிதை எழுதுகிறவன் நான்
என் வீட்டில்
எழுதுவதற்கென
கொடுக்கப்பட்ட மாளிகைவாசல்
அதுதான்
சாலையோர மனிதர்களில்
ஒருசிலரையாவது
எனக்கு
கொஞ்சம் தெரியும்
கவிதை வராத நாட்களில்
போவோர் வருவோர்
முகங்களில்
ஏதாவது தட்டுப்படுகிறதா என
பார்ப்பதுதான்
என்
பொழுது போக்கு
எழுதி முடித்த கவிதைகளின்
கடைசி வரிகளை
அழித்துவிடுகிறேன்
அவற்றை
காற்றில் பறக்கவிடுகிறேன்
ஜன்னலின் வழி
அவை
பறந்திறங்கும் போது
பறவைகளில் நிழலைப்
போலிருக்கும்
விலாசமற்ற வாசலைத் தேடி
கண்டடையும்
தபால்காரன் போல
கடைசி வரிக்கு
ஏற்ற யாரோ ஒருவரை
அந்தக் கவிதைகள்
தேடி தவழ்கின்றன
என் கவிதைக்கான
கடைசி வரியை
நீண்ட காலமாக
சுமந்தபடி வாழும்
யாரோ ஒருவர்
இந்த வழியே
எப்போதாவது
வராமலா போய்விடுவார்...
#தயாஜி #புத்தகச்சிறகுகள்_புத்தகக்கடை
குழந்தைகளுக்கான
ஓவியப்போட்டியில்
விதிமுறைகளுக்கு உட்பட்டு
பெற்றோரின் கண்காணிப்பில்
வண்ணம் தீட்டிய
குழந்தைக்கு
முதல் பரிசு கிடைத்தது
தன்
கை போன
போக்கில்
வண்ணங்களை அலையவிட்டு
பரிசு நிராகரிக்கப்பட்ட
குழந்தையின்
ஓவியம்
அவள் வீட்டில்
அழகான சட்டகத்தில்
தேதி நாள் விபரங்கள்
அறிவித்தபடி
அந்தக் குழந்தையைப் போலவே
அங்கும் இங்கும்
குதித்து விளையாடி கொண்டிருக்கிறது
அது
அந்தக் குழந்தைக்கு
ஒவ்வொருநாளும்
பரிசு கொடுத்தபடி
இருக்கிறது...
#தயாஜி #புத்தகச்சிறகுகள்_புத்தகக்கடை
சர்க்கஸ் வலை
அவிழ்ந்து விழுந்தது
சரி செய்வதற்குள்
உள்ளிருந்த
புலிகளில் ஒன்று
சட்டென தாவி
பார்வையாளர்கள் மத்தியில்
குதித்தது
யாருக்கும்
என்ன செய்வதென புரியவில்லை
அலறல் சத்தங்களுடன்
அங்கும் இங்கும்
ஓடத்தொடங்கினர்
எல்லோரும் தன்னைவிட்டு
ஓடுவதைப் பார்த்த
புலிக்கு மிகுந்த ஏமாற்றம்
அதற்கும்
அடுத்தென்ன என்பது
புரியவில்லை
சர்க்கஸ் வலைக்கே
திரும்பலாம் என்றது
வலைக்குள் இருந்த
புலிகளில் ஒன்று
அதன் பயிற்சியாளரைப்
பாதி தின்றுவிட்டிருந்தது
எங்கிருந்தோ வெடித்த
துப்பாக்கி தோட்டா
வலைக்கு வெளியில்
திகைத்து நின்ற புலியை
முதலில் துளைத்தது
வலைக்குள் குழுக்குள்ளும்
இருக்கும்வரை
எல்லோருக்குமே
பாதுகாப்புதான் போல...
#தயாஜி #புத்தகச்சிறகுகள்_புத்தகக்கடை
