- விற்காத பலூன்கள் -

- விற்காத பலூன்கள் -

அன்று மழை
எந்தப் பலூனும்
விற்கவில்லை
அவன்
அழுத்தொடங்கினான்...

எப்போதும்
விற்ற பலூன்களுக்கு
அழுவதைவிட
விற்காத பலூன்களுக்கு
அவன்
குறைவாகத்தான் அழுகிறான்

#தயாஜி #புத்தகச்சிறகுகள்_புத்தகக்கடை

- அதனால் என்ன ? -

எதார்த்தமாக இருக்கிறது
அதனால் என்ன?
நன்றாக இருக்கிறது
அதனால் என்ன?

ஆழமாக இருக்கிறது
அதனால் என்ன?
கண்ணீர்விட வைக்கிறது
அதனால் என்ன?

நினைவை எங்கோ அழைக்கிறது
அதனால் என்ன?
சின்னதாய் சிரிக்கிறோம்
அதனால் என்ன?

மொழி இனிமையாக இருக்கிறது
அதனால் என்ன?
அத்தனையும் உண்மை
அதனால் என்ன?

மறக்கவே முடியாது
அதனால் என்ன?
அதுவொரு ஆன்மீக அனுபவம்
அதனால் என்ன?

ஒருவகையில் அது கண்ணாடி
அதனால் என்ன?
வலியின் அடையாளம்
அதனால் என்ன?

யாருக்காவது
புரியாமல் இருந்தால்தான்
அதை கவிதையென ஒத்துக்கொள்வோம்

அதுவரை எங்களுக்கு
அதனால் என்ன?

- ஆகக்கடைசியாய் ஓர் அதிசயம் -

எது அதிசயம் ?
கடலை பிளந்து நடப்பதா
தூணை உடைத்து தோன்றுவதா
அசரீரியாய் அழைப்பதா

இல்லை
எதுவும் இல்லை

குழந்தைகளைச் சுடாத
துப்பாக்கிகளும்
குழந்தைகளை கொல்லாத
வெடிகுண்டுகளுமே

இவ்வுலகில்
தோன்ற வேண்டிய
ஒரேயொரு
அதிசயம்

எந்தக் கடவுளாலும்
நிகழ்த்த முடியாத
ஆகக்கடைசியான
அதிசயம்
இது ஒன்றுதான்....

#தயாஜி

- உலகின் ஓயாத ஒப்பாரி -

இவ்வளவு

சின்னச்சின்ன குழிகளைத்

தோண்டுவதற்கு

ஏன் 

இத்தனை இத்தனை

துயரை 

நாம் சுமக்க வேண்டியுள்ளது

வெடித்து சிதறியது

அவர்களின் சின்னஞ்சிறு

உடல்கள்தானே

என 

கடந்துவிடுகிறார்கள்

அதிகாரங்களை ஆள்கிறவர்கள்

 

இந்த உலகை

தன் தூய 

அன்பின் குதூகலத்தில்

பார்த்தக் குழந்தைகளின்

கனவுகள் 

எவ்வளவு பெரியது

எதுவரை பறந்தது

ஒருபோதும் 

ஓயாத இந்த ஒப்பாரிகள் 

ஏன் 

நம் காதுகளுக்கு மட்டுமே 

கேட்கிறது

#தயாஜி

- வண்ணம் மாறாத இரத்தம் -

அந்தப் 

பள்ளிக்கூட வாசலில்

ஏதோ ஒரு குழந்தையின்

புத்தகப்பை மட்டும்

தனித்திருக்கிறது

பல நாட்களாக

தனித்திருக்கும்

அந்தப் புத்தகப்பையில்

வழிந்து 

பின் காய்ந்து போயிருப்பது

 

தன் சக நண்பர்களின்  

பெயர் கூட 

இன்னும் 

முழுதாய் மனப்பாடம் ஆகாத 

குழந்தைகளின்

என்றுமே வண்ணம்

மாறாத இரத்தம்

#தயாஜி

சின்னச்சின்ன கனவுகள்

பெரிய பெரிய
கனவுகளில் அவர்கள்
தொலைந்து போகிறார்கள்

சின்னச் சின்ன
கனவுகளில் நாம்
வாழ்ந்துவிட்டு போவேமே

என்ன குறைந்துவிடப் போகிறது
நம்மை தவிர
யாருக்கு நிறைந்துவிடப் போகிறது

#தயாஜி #புத்தகச்சிறகுகள்_புத்தகக்கடை

- 'ஒளி'க்கும் கற்பூரத்துளிகள் -

இங்கு
எல்லா கற்பூரங்களும்

கடவுளுக்காய் 
'ஒளி'ப்பதில்லை

சில
கற்பூரங்கள்

வெறுமனே
காற்றில் கரைந்து

தன்னைத்தானே
அழித்து கொள்கின்றன

அதில் விருப்பமும்
கொண்டிருக்கின்றன...

#தயாஜி #புத்தகச்சிறகுகள்_புத்தகக்கடை

- தகப்பனின் சாமி -

பொம்மி

என் தோளில் அமர்ந்து

நீ 

காணும் உயரங்கள்

ஒவ்வொன்றும்

உனக்கானது மட்டுமல்ல

எனக்கானதும் கூட

அது

நமக்கானதும் கூட

நான் காணாத 

உயரங்களையும்

உனக்கு காட்டவே

என்

வலித்த தோள்களுக்கு

வலு 

சேர்த்து கொண்டிருக்கிறேன்

உன்னைச் சுமப்பது போல

நான் 

என்னையும் சுமந்தபடி

பயணிக்கிறேன்

இன்னும் 

எத்தனை எத்தனை

படிகளோ

அத்தனையும் 

உன் துணையால்

கடந்திட வேண்டுகிறேன்

இனி 

நீதான்

என் விதியின்

கையெழுத்து

என் புதிய 

தலையெழுத்து

தகப்பனாய் 

உனைச் சுமந்தாலும்

தகப்பன்சாமியாய் 

நீயே

எனை வழிநடத்து

#பொம்மி #தயாஜி #புத்தகச்சிறகுகள்_புத்தகக்கடை