- அவளை நீங்கள் பார்க்க வேண்டும் -

அவளுக்கு பெயர் அவசியமில்லை. தேவதை என்கிற பெயருக்கு நூறு சதவிதம் பொருத்தமான முகத்தைப் பெற்றிருந்தாள். அவளை நீங்கள் பார்க்க வேண்டும்.

சில முகங்கள் சில வண்ணங்களால் அழகடையும். ஆனால் இவள் முகமோ எல்லாவித வண்ண ஆடைகளையும் அழகடையச்செய்யும். அவளை நீங்கள் பார்க்க வேண்டும்.

இயற்கை ஏதோ ஒன்றை அவள் கண்களில் வைத்திருந்தது. உங்கள் கோவத்தையும் வெறுப்பையும் அரை நொடியில் அக்கண்கள் இல்லாமலாக்கிவிடும். அவளை நீங்கள் பார்க்க வேண்டும்.

முத்துப்பற்கள் சிரிப்பில், துருத்தித்தெரியும் வலது பக்க சிங்கப்பல்லும் அவள் அழகைக் கூட்டிக்காட்டும். அவளை நீங்கள் பார்க்க வேண்டும். 

அப்படியொரு தேவதை நம் குடும்பத்திலும் இருக்க வேண்டுமென யார்தான் கேட்கமாட்டார்கள். அவளின் ஒளிரும் கண்கள் ஒட்டுமொத்த குடும்பத்தையுமே ஒளிரச்செய்யும். அவளை நீங்கள் பார்க்க வேண்டும். 

சீக்கிரம் பார்த்துவிடுங்கள். அதோ அவளது முகம். எங்கிருந்தோ வீசப்பட்ட ஈவு இரக்கமற்ற வெடிகுண்டால் அவள் முகத்தை மட்டும் ஒன்றுமே செய்ய முடியவில்லை. அவளை நீங்கள்........