- உங்களில் யாரும் -

மன்னிக்கவும்

இன்னும்
அவ்வளவு தூரத்திற்கு
என்னால் வரமுடியாது

உங்களில் யாரும்

என் துயரங்களைத்
தூக்கிச் செல்லுங்களேன்

நான் கொஞ்சம்
ஆசுவாசப்படுத்திக்
கொள்கிறேன்

#தயாஜி #புத்தகச்சிறகுகள்_புத்தகக்கடை

- சாத்தானின் கன்னுக்குட்டி -

கடவுளால் மட்டுமே
காப்பாற்ற முடிந்த
இடத்திற்கு
எங்களைத்
தள்ளிவிடுகிறீர்கள்

நாங்கள்
கடவுளின்
செல்லப்பிள்ளையாகவும்
மாறுவோம்

சாத்தானின்
கன்னுக்குட்டியாகவும்
மாறுவோம்

- கரையறியா கண்ணீர் -

யாரோ ஒருவரின்
முன்னால் அமர்ந்து
உங்களால்
இப்படி அழமுடிகிறதே
அது போதாதா

இங்கு
அழவும் முடியாதவர்களே
அதிகம்

குறைந்தபட்சம்
அவர்களால்
சேர்ந்தும் சேர்த்தும்
வாழ முடிந்தது
அந்தக் கண்ணீரைத்தான்

ஒருபோதும் அது
கண்களை விட்டு
தவறியும்
வழிந்தது இல்லை
அதற்கான
வழி
அறிந்ததும் இல்லை

#தயாஜி #புத்தகச்சிறகுகள்_புத்தகக்கடை

- ஊழல் வினை -

ஊழல்வாதிகளுக்கு
எடுக்கவும் பதுக்கவும் தெரிகிறது
அனுபவிக்க வாய்ப்பதில்லை...

உணர்ந்த மக்களுக்கு
எதிர்க்கவும் எரிக்கவும் வாய்க்கிறது
பயன்படுத்த தெரிவதில்லை....

- ஊமைகள் -

ஆமையோட்டில்
அழகாய்
வரைந்து கொடுக்கிறார்கள்
ஓவியங்களை

வரைந்தவர்களுக்கும்
வாங்கியவர்களுக்கும்
அது
மகிழ்ச்சி
கொண்டாட்டம்
கௌரவம்
அடையாளம்
நினைவுச்சின்னம்

சுமந்து கொண்டிருக்கும்
ஆமைகளுக்கு

அது
நிகழ்கால சுமை
வருங்கால ஊனம்
நிரந்தர துயரம்....

- அதிலொரு ஆனந்தம் -

எங்களைப் பேச
சொல்லாதீர்கள்
எங்களைச் சிரிக்க
சொல்லாதீர்கள்
எங்களைச் சிந்திக்க
சொல்லாதீர்கள்
எங்களை எழுத
சொல்லாதீர்கள்

பின்னர்
நீங்களே எங்களைக்
கொன்றுவிடுவீர்கள்

அதிலொரு ஆனந்தம்
உங்களுக்கு....

- எதற்கு வேண்டும் கவிதை ? -

கவிதை எழுத
இனி கஷ்டப்பட
தேவையில்லை...

எதை
எழுதி கொடுத்தாலும்
கவிதை என
விற்றுவிடுகிறார்கள்...

நல்ல கேமரா காட்சி
ரம்யமான பின்னணி இசை
சிரித்தபடி பேசும் முகம்...

மற்றபடி
கவிதை புத்தகங்கள்
விற்க
எதற்கு வேண்டும்
கவிதை...