‘பலிக்கும்’ ஜோதிடங்கள்

ஜோதிடம், எண்கணிதம், ஜாதகம் போன்றவற்றில் உங்களுக்கு நம்பிக்கை இருக்கிறதா..?. அதில் நம்பிக்கை உள்ளவர்கள், இப்படி வாங்களேன் உங்களுக்குக் கைகொடுக்கனும். நம்பிக்கை இல்லாதவங்களும் வாங்க உங்களுக்கும் கைகொடுக்கனும். இரு தரப்பினர்க்கும் கைகொடுக்கறேன்னா காரணம் இல்லாமல் இருக்குமா.? காரணத்துக்கு ஒரு கதை இருக்கிறது. கதையைச் சொல்லவா?

அந்த தோட்டத்துக்கு இரு ஜோதிடர்கள் வந்தாங்களாம். இருவரும் ஒரே குருகிட்ட பாடம் படிச்சவங்களாம். தோட்டத்திற்கு நுழைஞ்சதும் அவங்களுக்கு தாகமா வந்துச்சாம். அப்போ ஒரு வீட்டு வாசல்ல நின்னுகிட்டு தண்ணி கேட்டாங்களாம். அந்த நேரம் பார்த்து வீட்டு பின்னால இருக்கிற கிணத்துல மண் குடத்தால் தண்ணி எடுத்துக்கிட்டு இருந்தாங்க ஒரு அம்மா. அப்போ கயிறு வழுக்கி குடம் கிணத்துக்குள்ளயே விழுந்துடிச்சாம். அப்பறம் வேற கயிறைக் கொண்டு வந்து வேற மண் சட்டியில் தண்ணி எடுத்துக் கொடுத்தாங்களாம்.

தண்ணி கொடுத்தவங்க சும்மா இல்லாம ரொம்ப வருசத்துக்கு முன்னே விட்டுட்டுப் போன வீட்டுக்காரர் எப்போ வருவார்னு ஜோசியம் கேட்டாங்களாம். அந்த ரெண்டு ஜோதிடர்களும் பதில் சொன்னாங்க. ஆனால் ஆளுக்கு ஒரு பதில் சொன்னாங்களாம். ஒருத்தரு, வரமாட்டாருன்னும்; அடுத்தவரு, வருவாருன்னும் சொன்னாங்களாம். என்னடா இது ஒரே குருகிட்ட படிச்ச இந்த ரெண்டு ஜோசியக்காரங்களும் இப்படி எதிர்மறையான பதிலைச் சொல்றாங்களேன்னு ஊர் மக்கள் ஒன்னுகூடிட்டாங்க. நம்மாலுங்க சும்மாவே வ்னதிடுவாங்க. இப்போ சொல்லவா வேணும்.

இப்போ முடிவா என்னதாம்பா சொல்றிங்கன்னுக் ஊர் மக்கள் கேட்டாங்களாம். அப்பவும் ரெண்டு ஜோசியக்காரங்களும் சொன்ன பதிலேதான் சொன்னாங்களாம். சும்மா விடுவாங்களா ஊர் மக்கள். வருவாருன்னு சொன்னவர்கிட்ட எப்போ வருவாருன்னு கேட்க அவரும் ஏதேதோ கணக்கு கையில போட்டுக் காட்டி இன்னும் ஒரு மணி நேரத்திலன்னு சொல்லிபுட்டாரு. காத்திருந்துக் காத்திருந்து மக்கள் ஒரு மணி நேரமும் யார் சொன்னது நடக்கும்னு பேசிக்கிட்டாங்க.

ஐம்பது நிமிசத்துக்குள்ளயே தாடியோட ஒருத்தரு அந்த வீட்டுக்கு வந்தாரு. அட அவர்தான் வீட்டுக்காரர்னு அந்த அம்மா சொன்னாங்க. ஊர் மக்களும் வருவாருன்னு சொன்ன ஜோசியக்காரரை அப்படித்தான் புகழ்ந்தாங்க. பாவம் வரமாட்டாருன்னு சொன்ன ஜோசியக்காரை யாரும் கண்டுக்கவே இல்லை.

கொஞ்ச நேரம் கழிச்சி ரெண்டு ஜோசியக்காரரும் புரப்பட்டாங்க. அவங்க ரெண்டு பேரும் எப்படி வேறவேற பதில் சொன்னாங்கன்னு கேட்டுகிட்டாங்க. ஒருத்தரு சொன்னாரு மண் சட்டி ஒடிஞ்சதை கணக்கு பண்ணேன்னு சொன்னாரு. அடுத்தவர் சொன்னாரு நான் மண் சட்டி ஒடிஞ்சி குடத்தில் இருந்த தண்ணி மறுபடியும் கிணத்து தண்ணியோட கலந்ததை கணக்கு பண்ணேன்னு சொன்னாரு. ஆக, பாருங்க ஒரு விசியம் தவறா இருக்கா சரியா இருக்கான்னு பார்க்கற முன்னுக்கு ; அதில் சம்பந்தப்பட்டவங்க எப்படிப்பட்டவங்கன்னு பார்க்கனும்.

இப்படியொரு கதையை சொல்லிய நண்பனுக்கு என் உதவி தேவைப்பட்டது. இந்த கதைக்கும் ஜோதிடத்திற்கும் சம்பந்தமில்லை. ஆனால் ஜோதிடத்துக்கும் இந்தக் கதைக்கும் சம்பந்தம் உண்டு.

பிரச்சனை மேல் பிரச்சனைகள் அர்ச்சனை செய்ததால், தீர்வுக்காக ஜோதிடம் பார்க்க வேணுமாம். எனக்கும் நேரம் இருந்ததால் உடன் சென்றேன்.

கோவிலுக்கு அருகிலேயே ஜோதிடரின் வீடும் இருந்தது. கோவிலைவிட வீடே வசதியா தெரிந்தது. தலைமேல் விளக்கும் தரையின் பளிங்கும் அதற்கு ஓர் உதாரணம். இன்னமும் இருக்கிறது. வரவேற்பறையில் அமர்வதற்கென்றே உயர் ரக சோபா செட்டுகள்; வருசையாக இருப்பதைப் பார்த்தால் வருகையாளர்களின் எண்ணிக்கை அதிகம்தான்.

முன்பதிவு செய்த பிறகே ஜோதிடரைப் பார்க்க முடியுமாம். இரண்டு வாரங்களாக நண்பனே காத்திருந்ததாகச் சொன்னான். கையில் ஏதும் கொண்டுவரவில்லை. வருவதற்கு முன்னதாகவே தொலைபேசியின் வழி தேவையான விபரங்கள் வாங்கப்படுவதால்; வரும் போது கைவீசிக்கோண்டே வராலாம் என்றான் நண்பன். உடன் சொன்னேன் அப்படியே என்னைப் போல வேலை இல்லாத யாரையும் கூட்டி வரலாம்.

சிரிப்பு சத்தம். அவ்வளவு சத்தமாக நான் எந்த ஜோக்கையும் அப்போது சொல்லியிருக்கவில்லை. ஆனாலும் சிரிப்புச் சத்தம். இப்போதுதான் கவனித்தேன். எங்கள் எதிரே போடப்பட்டிருக்கும் நாற்காலிகளில் இரண்டு பேர். எப்போது வந்தார்களோத் தெரியவில்லை. வந்தவர்களின் நெருக்கத்தைப் பார்த்தால்...... காதலர்களா..? கணவன்..? மனைவியா என யூகிக்கவே முடியவில்லை. உருவத்தைப் பார்த்தால் கணவன் மனைவி. நாங்கள் இருப்பதையும் பொருட்படுத்தாமல் கொஞ்சி குலாவுவதைப் பார்த்தால் காதலர்கள்.

இருந்தாலும் இதெல்லாம் அநியாயம். என்னதான் சுற்றி நான்கு சுவர்களுக்கு மத்தி என்றாலும், எதிரில் முன்பின் அறிமுகமற்ற நாங்கள். உள்ளே அறையில் ஜோதிடர். அவரிடம் ஜோதிடம் பார்த்துக் கோண்டிருப்பவர்கள்.

எதிரில் அமர்ந்ததால் என்னவோ, அவ்வபோது கண்ணிரண்டும் அவர்களை சட் சட் என பார்த்துத் திரும்பியது. நான்தான் அப்படியென்றால், என்னைக் கூட்டி வந்த நண்பன் அதற்கு மேல். நான் திரும்பி திரும்பி பார்த்ததை கொஞ்சமும் கழுத்தைத் திருப்பாமல் அங்கேயேப் பார்த்துக் கொண்டிருந்தான்.

சட் சட் பார்வையில் சிக்கியவை;

தாராள இடத்திலும் காற்றுக்கே இடமின்றி ஒட்டியிருந்தார்கள்;

பேச்சின் முடிவில் ஒருவர் கண்ணத்தை மற்றொருவர் கிள்ளினார்கள்;

அவன் காதில் ஏதோ சொல்ல அவள் சிரித்தால்;

இடுப்பை இரண்டு முறை கிள்ளி விளையாடிக் கொண்டார்கள்;

ஒருவர் முதுகை ஒருவர் இப்படியா தேய்ப்பது; என்ன முதுகு தேய்த்து குளிக்கிறார்களா;

நல்ல வேலை முத்தமிடவில்லை; அல்லது நான் அதுவரை பார்க்கவில்லை;

சட் சட் பார்வைக்கே இவ்வளவு என்றால், அவர்களையே வைத்தக் கண் வாங்காமல் பார்த்த என் நண்பனிடம் கேட்டால்... ஒரு ‘ஏ’ படத்தையே எடுக்கலாம் போல.

உள்ளே இருந்தவர்கள் வெளிவந்தார்கள். அவர்களுடன் வந்திருந்த ஒரு இளைஞன் என் நண்பனின் பெயர் சொல்லி அழைத்து இன்னும் கொஞ்ச நேரத்தில் கூப்பிடுவோம் என்றான்.

நானும் உள்ளே வரவேண்டுமென கேட்டுக் கொண்டதால் கண்ணெதிர் காட்சிகளை காணமுடியாதோ யோசித்தேன். வெளியில் ஏதோ கார் வரும் சத்தம் கேட்டது. வீட்டின் வாசலில்தான் அந்த கார் நின்றிருக்க வேண்டும். அதுவரை கொஞ்சியும் உரசியும் இருந்தவர்கள் இப்போது பதட்டாமானார்கள்.

தெரிந்த இடுப்பை மறைத்து இருந்த நெருக்கத்தை கலைத்தார்கள். கணவன் மனைவி அல்லது காதலர்கள் இரண்டு நாற்காலிகள் இடைவேளிவிட்டு உட்கார்ந்தார்கள். உள்ளே வேகமாக வந்தவரைப் பார்த்ததும் அந்த பெண் எழுந்து ஓடினார். நிச்சயம் அவரின் வருகைக்காக காத்திருந்தது போலவே ஒரு ஓட்டம். அவரும் தாமதமா வந்ததற்கு வேலையைக் காரணம் சொல்லி முன்பு அந்த பெண் அமர்ந்திருந்த நாற்காலியில் அமர ஆயுத்தமானார்.

இரண்டு நாற்காலி இடைவேளைவிட்டு அமர்ந்திருந்த அந்த நபர், வந்தவரைப் பார்த்து சிரித்தவாரே எழுந்தார். உள்ளே இருந்து மீண்டும் வெளிவந்த இளைஞன் எங்களை அழைக்க உள்ளே சென்றோம்.

முன்பெல்லாம் நெற்றியில் பட்டையும்; காவியும் அணிந்து; தரையில் அமர்ந்து ஜோதிடம் சொன்னார்கள். இப்போது, உயர் ரக மேஜை நாற்காலி. கணினி. எங்களை அமர வைத்து தேவையில்லாத கதைகளையெல்லாம் பேசினார். பிறகு கணினியைப் பார்த்தவாரு பலன் சொல்ல ஆரம்பித்தார். அவர் சொன்னதில் பெறும்பாலும் தொடக்கத்தில் எங்களிடம் கேட்டதே இருந்தது. ஆனாலும் நண்பன் ஒவ்வொன்றையும் வியப்பாகத்தான் கேட்டான்.

அரைமணிநேரம் இருக்கும்; புறப்படும் முன்பு என்னைப் பார்த்து சிரித்தார் நானும் சிரித்தேன். உங்களுக்கு இதிலெல்லாம் நம்பிக்கை இல்லைன்னு தெரியுது என்றான். சிரித்தேன். வேணும்னா வெளியா வந்திருக்காங்களே அவங்க ரெண்டு பேரையும் கேளுங்க என் ஜோதிடத்தை என்றார். புருவத்தைச் சுருக்கி ஏன் என்பதாகக் கேட்டேன்.

கல்யாணமாகி மூணு வருசமா அவங்களுக்கு குழந்தை பாக்கியம் இல்லை. இங்க வந்து நான் நாள் நட்சத்திரம் கணிச்சிக் கொடுத்தேன் இப்போ பாருங்க கரு தங்கியிருக்குன்னு சந்தோஷமா வந்திருக்காங்க என்றவரிடம் கேட்கத் தோன்றியது;

“நாள் நட்ச்சத்திரத்தை பயன்படுத்தியது கணவனா இல்லை... அதுவரை கணவன் போல அமர்ந்திருந்தவனா..?”

எது எப்படியோ; ஜோதிடங்கள் பலித்துவிடுகின்றன.

-------- தயாஜி -------

எஸ்.ரா

(20.8.2011 )எஸ்.ரா-வின் புத்தகங்கள் என்றாலே சிறப்பு அதிலும் இந்த நான்கு புத்தகங்களிலும் எஸ்.ரா-வின் கையொப்பம் உள்ளதென்றால் வேற எப்படி சொல்வது..........

1. என்றும் சுஜாதா
சுஜாதாவின் பன்முக ஆளுமை வழியே ஒரு பயணம். தேர்வும் தொகுப்பும் எஸ்.ரா.

2. உறுபசி
எஸ்.ராவின் நாவல்.

3. வாக்கியங்களின் சாலை
இந்த நூற்றாண்டின் சிறந்த படைப்பாளிகள் குறித்த பார்வையும் அவர்களின் முதன்மையான புத்தகங்கள் குறித்து எழுதப்பட்ட புத்தகம் இது.

4. பேசத்தெரிந்த நிழல்கள்
தன்னை பாதித்த சினிமா அதற்கான காரணம், அதிலிருந்து மீளும் நினைவுகள் குறித்தும் தான் சந்தித சில திரை நட்சத்திரங்கள் குறித்தும் சொல்லியிருக்கும் புத்தகம் இது - எஸ்.ரா


எனக்கும் எஸ்.ரா-வுக்கும் புத்தகம் வழி ஏற்பட்ட இந்த உறவை பற்றி எழுத்தில் பதிவு செய்ய விரும்புகிறேன். சீக்கிரம் செய்வேன்.

எனது 'கேசவன் - முதல் நண்பன்' என்ற கதையில் தொடக்கத்தை பலர் முன்னிலையில் வாசிக்க வைத்து "உங்களிடம் நல்ல எழுத்துகள் இருக்கிறன தொடர்ந்து எழுதுங்கள்" என சொன்னவரிடம் இருந்து வந்தது வெறும் வார்த்தைகள் அல்ல; 'ஆசிர்வாதம்'

தயாஜி......

தண்ணீர் தேசம்

(29-09-2011 )
கண்ணதாசனின் 'சுருதி சேரதாக ராகங்கள்' படித்து முடித்துவிட்டேன். அது குறித்து பகிர்ந்தும் விட்டேன் என் வலைத்தளத்தில். அடுத்ததாக வைரமுத்துவின் 'தண்ணீர் தேசம்' புத்தகத்தை எடுத்திருக்கிறேன். 8/11/2009-ல் வாங்கிய புத்தகம் இன்று காலைதான் அலமாரியில் இருந்து எடுத்திருக்கிறேன். தமிழில் ஒரு விஞ்ஞானக் காவியம் என சொல்லப்படும் புத்தகம் இது. வைரமுத்துவின் ஆரம்பகால படைப்புகள் கவனிக்கத்தக்க ஒன்று. 1996-ல் இந்த புத்தகத்தின் முதற்பதிப்பைச் செய்திருக்கிறார்கள்.
படித்ததும் இப்புத்தகம் குறித்து பகிர்கின்றேன்.....
இப்படிக்கு தயாஜி

படித்தப் பிறகு பார்வை


4.10.2011 பின்னிரவு மணி 12.30.

"தண்ணீர் தேசம்" தன்னைத்தானே தமிழில் ஒரு விஞ்ஞானக் காவியம் என்று சொல்லும் புத்தகம்....!! இதனைப் படித்துவிட்டேன். இது குறித்து என்ன சொல்வது............. முகநூலில் இப்புத்தகம் குறித்து நான் எழுதியதையும் நண்பர்களுடன் பேசியதையும் கொடுப்பதே போதும் என நினைக்கிறேன்.

நண்பர்களுடன் ஏற்பட்ட உரையாடலில் சில………….

Tharmarajan Gunasekaran
படித்துப் பாருங்கள். அருமையாக இருக்கும்.
தமிழ் ரோஜா & கலைவண்ணன் காதலும், சலீம், இசக்கி, பாண்டி இவர்களின் பாத்திரப் படைப்பும் படிப்பதற்கு ஆர்வமூட்டும்.

Tayag Vellairoja
பாதி படித்துவிட்டேன்........... நண்பர்கள் நீங்கள் எதிர்ப்பார்த்ததுபோல் அது குறித்து எழுத மாட்டேன்....
Tharmarajan Gunasekaran நண்பா.... எல்லோர்க்கும் அருமையாக இருக்கும் என்பதிற்கில்லை சிலருக்கு அறுவையாகவும் இருக்கலாம்... தமிழில் ஒரு விஞ்ஞானக் காவியம் என சொல்லியிருக்கின்றார் அதன் படைப்பாளர். வெறும் புள்ளிவிபரங்களை உரையாடலின் ஊடே சொல்லிவிட்டால் விஞ்ஞானக் காவியம் ஆகிவிடுமா….?

ஸ்ரீவிஜி விஜயா
இந்த புத்தகத்தை கதைக்காக படித்தால் தலை வலிக்கும்.. தமிழை சுவைப்பதற்காகப் படித்தால், ரசிப்பீர்கள்.சிறிய சிறிய தகவல்கள் கண்களை அகல விரியவைக்கும்..சுவாரிஸ்யம்

Tayag Vellairoja
உண்மைதான் அக்கா... விஞ்ஞானக் காவியம் என சொல்லி.......... தகவல்களை கொடுத்திருக்கின்றார்.......

வட்டாரக் கல்வி வேறு; அறிவியல் வேறு...............

ஸ்ரீவிஜி விஜயா ‎
:)))))))))) there u r.

Tayag Vellairoja

நன்றி அக்கா...... படித்த பிறகு என் பார்வை என்ன என்பதனை இப்படித்தான் எழுதப்போகிறேன்.... வெறுமனே வைரமுத்துவைக் காப்பாற்ற நினைக்காமல்.......... அவரை ஒதுக்கிவைத்து விட்டு... விஞ்ஞானக் காவியம் என சுயவிளம்பரம் செய்யும் இந்த தன்முனைப்பு படைப்பாகவே இந்த தண்ணீர் தேசத்தைப் பார்க்கிறேன்.
இதில் விஞ்ஞானத்தை விடவும் தகவல்கள் அதிகம், தகவல்களை விடவும், தன்முனைப்பு வாக்கியங்கள் அதிகம் , தன்முனைப்பு வாக்கியங்களை விடவும் பாடல் வரிகளும் கவிதை நயங்களும் அதிகம்….
இதை எழுதியவர் வைரமுத்து என்பதை கொஞ்ச நேரம் ஒதுக்கி வைத்து அல்லது மறந்து உண்மையான வாசிப்பை இந்த படைப்பின் மீது செலுத்தினால் மேற்சொன்னதுதான் பதிலாக கிடைக்கிறது…..


ஸ்ரீவிஜி விஜயா

உங்கள் பார்வை எதார்த்தம்.வாழ்த்துகள். நான் மேலோட்டமாகத்தான் தம்பி.. எனக்குப் புரிய கஷ்டமாக இருந்தது


Tayag Vellairoja
நன்றி அக்கா.... நீங்கள் எதார்த்தம் என்கிறீர்கள் சிலர் "நீ என்ன வைரமுத்துவை விட பெரியவன்ன்னு நினைப்பான்னு" கேள்வி கேட்கறாங்க.....:) பாவம் அவர்களின் மைல்கல் அவ்வளவுதான்...

ஸ்ரீவிஜி விஜயா
சும்மானாலும் கிளப்பி விடுவார்கள்... உங்க பாணியிலே தொடருங்கள். உங்க வாசிப்புத் திறன்..பெருமைபட வைக்கிறது. இன்னுன் 20திலே இருக்கும் நீங்கள், எங்க வயதிற்கு (40+) எங்கியோ போயிடுவிங்க தம்பி. சிறந்த படைப்பாளியாவீர்கள்.. விழுந்து விழுந்து எழும் போது எழுத்தில் பக்குவம் வரும்..தொடருங்கள் உங்கள் பணியை உங்க பாணியிலே... வாழ்த்துக்கள்.

..............................................................................................................


ஒருவேளை இந்த தண்ணீர் தேசம் எழுதபட்ட ஆண்டுகளின் விஞ்ஞானக் காவியமாகத் தெரிந்திருக்கலாம்….. ஆனால் இப்போது படிக்கும் போது வெறும் புள்ளிவிபரங்களு தன்னம்பிக்கையும் தமிழின் அழகே தெரிகிறது……..
உங்களுக்கு என் கருத்தில் மாற்றுக் கருத்து இருக்கலாம்; சிலர்க்கு இருக்கும்;வாருங்கள் கருத்து பறிமாறுவோம் ஆனால் படித்து முடித்த பிறகே முன்வாருங்கள்; உங்கள் விஞ்ஞான எதிர்ப்பார்பையும் தண்ணீர் தேசம் ஏமாற்றும்…………..

இப்படிக்கு தயாஜி………

சுருதி சேராத ராகங்கள் - ‘படித்த பின் பார்வை’

சுருதி சேராத ராகங்கள் - ‘படித்த பின் பார்வை’

கண்ணதாசனின் ‘சுருதி சேராத ராகங்கள்’ படித்தேன். நான்கு மாறுபட்ட குடும்பத்தில் நடக்கும் பாலியல்தான் கதைக்களம்.

முதல் குடும்பம். கணவனின் உடல் பசிக்கு ஈடு கொடுக்க முடியாமல் தவிக்கிறாள் மனைவி. என்னதான் அவர்களுக்குள் நெருக்கத்தில் குறைவில்லையென்றாலும்; இரவில் கணவனின் கணம் மனைவிக்கு தாங்கமுடியாத வலியைக் கொடுக்கிறது. கணவனின் உடல் பசிக்கு மட்டுமாவது ஒருத்தி தேவை என தேடுகிறாள்.

இரண்டாவது குடும்பம். பல நாள் பேசாமல் இருந்த மனைவியிடம் தானே பணிந்து பேச ஆரம்பிக்கிறான் கணவன். அதனைத் தொடர்ந்து கணவன் மனைவி இருவரும் தன் தவறுகளை உணர்ந்து பேச ஆரம்பிக்கின்றார்கள். மனைவி கர்பமாகிறாள். கணவனுக்கு; அவனையும் மீறிய சந்தேகம் எழுகிறது. இதற்கு முன்பு வரை மனைவி செய்த்தெல்லாம், இப்போது சந்தேகத்தை ஆழப்படுத்துகிறது. குத்தலாக பேச ஆரம்பிக்கும் கணவனின் சந்தேகம் மனைவியை மேல்மாடியில் இருக்கும் உறவினர் வீட்டுக்கு செல்ல காரணமாகிறது.

மூன்றாவது குடும்பம். கணவன் மீது தீராத காதல் வைத்திருக்கிறாள் மனைவி. தினமும் கணவன் தன் அருகிளேயே இருக்க வேண்டும் என விரும்புகிறாள். ஒவ்வொரு இரவையும் கணவனுடன் கட்டிலில் கழிக்கவே ஆசை கொள்கிறாள். கணவனுக்கோ உடல் பசி மட்டுமே குடும்பத்திற்கு முக்கியமல்ல. காம்ம் ஓர் அங்கமாகவே படுகிறது. மனைவியில் இந்த கட்டில் ஆசையை எப்படி சமாளிப்பது என யோசித்தே அவளுக்கு அறிவுறைகள் சொல்லி; அவளை வருத்தப்பட வைக்கிறான்.

நான்காவது குடும்பம். குடும்பம் என சொல்வதைவிட ஒரு இளம் விதவை எனவே சொல்லலாம். அவள் ஆதரவற்றவள். ஆசிரியை. அவளைவிட பதினைந்து வயது குறைந்த ஒரு இளைஞனை சில ஆண்டுகளாக வளர்த்து வருகிறாள். என்னதான் அவள் மனம் அவளின் கட்டுப்பாட்டில் இருந்தாலும் புற சூழல் அவள் மனக்கட்டுப்பாட்டை தகர்க்கிறது. ஒரு நாள் உனர்வுக்கு அடைமையாகி வீட்டு வாசலில் படுத்திருந்த இளைஞனை உள்ளே வந்து படுக்க சொல்கிறாள். பின்னர் நேரம் ஆகா ஆகா அவளை அறியாமல் அவளது கால்கள் அந்த இளைஞனின் பாய்வரை செல்கிறது. மறுநாள் நன்கு யோசித்து ஊருக்காக ஏன் வழவேண்டும் நாம் நமக்கா வாழ்வோம் என அவளும் அந்த இளைஞனும் முடிவெடுக்கின்றார்கள்.

இந்த நான்கு குடும்பத்தினருக்கும் நெருக்கமான மனோவியல் மருத்தவரிடம் தாங்கள் எதிர்நோக்கும் பிரச்சனைகளுக்கு எப்போதும் தீர்வை பெறுகின்றார்கள். அவரின் உரையாடல் நடைமுறைக்கு ஏற்ற வகையில் அமைந்திருக்கின்றன.

உதாரணமாக ;

கணவனுக்கு ஈடுகொடுக்க முடியாமல் அவன் பலத்தால் பாதிக்கப்படும் மனைவி, பலம் கொண்ட தன் கணவனை பலவீனப்படுத்த வேண்டும். அல்லது வலியை தாங்கித்தான் ஆகவேண்டும்.

ஊருக்கு பயந்து வாழ்வது ஒன்று. தனக்கான வாழ்க்கையை ஊருக்க பயப்படாமல் வாழ்வது ஒன்று. வெளியில் ஊருக்கு பயந்த்து போல் இருந்து உள்ளுக்குள் ரகசிய வாழ்க்கை வாழ்வது ஒன்று.

கணவன் மனைவியிடையே எல்லா கேள்விகளுக்கு பதில் சொல்ல வேண்டிய அவசியம் இல்லை. மனைவிதானே சொன்னாள் அதனால் என்ன..? கணவன்தானே சொன்னான் அதனால் என்ன..? போன்ற எண்ணங்கள் பிரச்சனைகளை குறைக்கும்.

கணவன் மனைவி கருத்துப் பரிமாற்றம் செய்யும் போது இரவுப் பொழுதில் கட்டிலில் செய்வது பிரச்சனைகளை குறைக்கவல்லது.

நான்கு குடும்பத்தினரும் எதிர்நோக்கும் பிரச்சனைகளுக்கு தீர்வாக கடைசியில் மனோவியல் மருத்துவர் மூன்று பக்கங்கள் பேசி தீர்த்து வைக்கின்றார்.

ஒரே நாளில் இந்த புத்தகத்தை படித்து முடித்து விட்டேன். இதற்கு முன் மூன்று நாள்களாக ‘நாஸ்டர்டாமஸ் சொன்னார் நடந்தது’ என்ற புத்தகத்தைப் படித்து தீர்க்கத்தரிசி குறித்து தெரிந்தும் குறிப்பெடுத்தும் கொண்டேன்.

படித்து முடித்த பிறகு ஏதாவது சின்ன களைப்பு ஏற்படட்து. சில சமயம் இப்படி எனக்கு ஏற்படுவதுண்டு. அதனைத் தீர்க்கவே எளிமையான புத்தகங்களை எதையாவது படிப்பேன். சின்ன சின்ன கவிதைகள் வாரா மாத சஞ்சிகைள் நகைச்சுவைகள் அடங்கும்.

அப்படி ஏற்பட்ட களைப்பை கலைவதற்கு புத்தக அலமாரியில் புத்தகங்களைத் தேடும் போது கண்ணதாசனின் இந்த புத்தகம் கையில் கிடைத்தது. தொடக்கத்தில் இருந்து இவர்பால் ஈர்ப்பு உள்ளதால் இந்த புத்தகத்தை படிக்க எடுத்தேன். பக்கங்கள் குறைவு.ஈருப்பு.ஏதாவது இருக்கும் என்ற நம்பிக்கை.

இந்த மாதிரியான புத்தகங்கள் நேரத்தை வீணடிக்கலாம்; இதற்கு செலவிட்ட நேரத்தை தமிழில் முக்கியமாகக் கருத்தப்படும் நாவல்களுக்கு செலவிட்டிருக்கலாம்; இந்த நாவல் என் அடுத்தக் கட்ட எழுத்து பயணத்திற்கு பெரியாத பயன்படாது என்கிற ரீதியில் என் முன்னேற்றத்தில் அக்கறை உள்ளவர்கள் சொன்னார்கள்.

அவர்கள் கூற்றிலும் உண்மை இல்லாமலில்லை.

இந்த நாவலை இப்போது நான் படித்ததன் காரணம் என் களைப்பை தீர்க்கவே அன்றி; என் முன்னேற்றம் கருதி அல்ல. 28 தேதி தொடங்கி மறுநாள் காலையில் 29.9-ல் படித்து முடித்துவிட்டேன். இரவு வேலை என்பதால் படிக்க முடிந்தது. அப்படி இப்படி என மொத்தமே செலவான நேரம் ஏறக்குறைய 3 மணி நேரமே இருக்கும். ஆக நேரமும் அதிகம் வீண் போகவில்லை.

இந்த நாவலைப் பற்றி சொல்லவேண்டுமெனின்; சிறுகதை ஒன்றில் சொல்ல வேண்டியதை நீட்டிக்கொண்டு போய் நாவல் என்று சொல்லியிருக்கின்றார்கள். இது குறுநாவல்.

இன்னமும் கூட ஆழமாக இந்த நாவலில் சொல்லியிருக்க முடியும். ஆனால் அப்படி எழுதப்படவில்லை. மேலோட்டமாக சொல்லப்பட்டிருக்கின்றது. மருத்துவரின் ஆலோசனையையும் கதையின் ஊடே சொல்லியிருக்க முடியும். அப்படி செய்யவில்லை. எழுதியவர் கண்ணதாசன் என்பதாலும்; நான் கண்ணதாசனின் விரும்பி என்பதாலும் இதனைப் படித்ததாக வைத்துக் கொள்ளலாம். இருந்தும் வழக்கம் போல இந்த ‘சுருதி சேராத ராகங்கள்’ குறுநாவல் மூலம் என்னால் கற்றுக்கொள்ள முடிந்தது.

சுருதி சேராத ராகங்கள்

(26.9 முதல் 28.9 ) 'நாஸ்டர்டாமஸ் சொன்னார் நடந்தது!' என்ற புத்தகத்துடன் மூன்று நாள்களைக் கழித்துவிட்டேன். நாஸ்டர்டாமஸ் என்கிற தீர்க்கதரிசி குறித்தும் பல வியப்பான சம்பவங்களையும் படித்து குறுப்பெடுத்துக் கொண்டேன்.

(28.9.2011) இப்போது படிக்க வேண்டிய புத்தகமாக கண்ணதாசன் எழுதிய 'சுருதி சேராத ராகங்கள்' என்ற நாவல் ஒன்றினை எடுத்திருக்கிறேன்.

கிட்டதட்ட 6 ஆண்டுகளாக அப்பாவின் புத்தக அலமாரியில் இந்த புத்தகம் இருந்தது. எடுப்பேன்;திறப்பேன்;சிலவரி

கள் படிப்பேன்;மூடி வைத்திடுவேன்;மறந்திடுவேன்.

சென்ற முறை வீட்டிற்கு சென்ற சமயம் சில புத்தகங்களுடன் இதனை எடுத்து வந்தேன்.

கண்ணதாசனை ரொம்ப பிடிக்கும் என்பதால் என் அலமாரியில் வருசையாக இருந்த கண்ணதாசன் புத்தகங்களில் ஒன்றை படிக்க எடுத்த போது மீண்டும் கண்ணில் பட்டது இந்த புத்தகம்.

படித்ததும் பகிர்கின்றேன்; வழக்கம் போல

////////பாலியல் பிரச்சனையை மையமாகக் கொண்டு எழுதப்பட்ட சிறுநாவல்.////////

கையெழுத்து............

இன்று ஞாயிற்றுக்கிழமை என்பதால், வீடு சத்தமாக இருந்தது. மற்ற நாட்களெல்லாம் வீட்டில் ஆள் நடமாட்டம் குறைவு என்பதால் இன்று மட்டும் இப்படி ஒரு இரைச்சல். சத்தமில்லாத நாள்களில் வீட்டில் ஏற்பட்டிருக்கும் அலங்கோலத்தை எல்லாம் இன்றைக்குத்தான் மாற்றியமைக்க வேண்டும். ஆறுநாட்கள், கொஞ்சம் கொஞ்சமாக வீட்டில் உள்ளவர்கள் சேர்த்து வைத்த சோம்பேரித்தனம், வீட்டின் திரைத் துணியிலும் தொலைக்காட்சி மேல் இருக்கும் தூசியிலும், சமையல் அறை எண்ணெய் பிசுபிசுப்பு கொண்ட அடுப்பிலும் ஒட்டிக் கொண்டிருந்தன. அவ்வபோது செய்திருக்க வேண்டியதை செய்திருந்தால் இன்றைய விடுமுறை நாளை மற்றவர்களைப் போலவே மகிழ்ச்சி நிறைந்த உரையாடலில் மூலமாகவோ ஏதாவது பயண ஏற்பாட்டிற்கோ செலவு செய்திருக்கலாம். அதற்கெல்லாம் வாய்ப்பு இல்லை. இப்போது மட்டுமல்ல, மணி இந்த வீட்டை வாங்கிய கடந்த 8 ஆண்டுகளாக இப்படித்தான் இருக்கிறது.

மணியின் மனைவி பவானியைப் பொருத்தவரை ‘இவரை திருத்தவே முடியாது’ என்ற முடிவுக்கு வருவதற்கு முன் பல முறை சொல்லியும் செய்தும் பார்த்தாகிவிட்டது. ம்ஹிம்.. மணி எதற்கும் மசியவே இல்லை. ஒரு நாள் இரு நாள் பழக்கமா உடனே மாற்றிக் கொள்ள. பள்ளியில் தொடங்கியப் பழக்கம் இது. அதிலும் குறிப்பாக மணியின் கையெழுத்தை நீங்கள் பார்த்திருக்க வேண்டும். அட.... அட..... என்ன அழகு எவ்வாறான எழுத்து வடிவங்கள் என்று மணி தனக்குத்தானேச் சொல்லிக் கொண்டாலும் கோழி கால் பட்ட மண் போலத்தான் நமக்குத் தெரியும். காக்கைக்கே தன் குஞ்சு பொன்னாகத் தெரியும் போது, மனிதனுக்கு மட்டும் கையெழுத்து உண்மை வடிவிலாத் தெரியப்போகிறது.

கையெழுத்தில் தொடங்கிய ஒழுங்கின்மை வீட்டிற்குள் நுழைந்தது. வீட்டில், கட்டிலைத்தான் முதன்முதலில் பாதித்தது அந்த ஒழுங்கின்மை. ஒழுங்கற்ற முறையில் இருக்கும் கட்டிலின் நிரந்தர வடிவத்தை கவனிக்க மறந்த பெற்றோரால், கட்டிலைத் தாண்டி ஒவ்வொரு இடமாக நுழைந்தது ஒழுங்கின்மை. கையெழுத்து, கட்டில், அப்புறமென்ன சமையல் அறையும் வாசற்படியும்தான் தொடர்ந்து பாதிக்கப்பட்டன.
சாப்பிட்ட பிறகு கழுவ வேண்டிய உணவுத்தட்டும், குப்பையில் போட வேண்டிய சாப்பிட்ட மிச்ச மீதியும் அப்படியே சமையல் அறையில் வைக்கப்பட்டது. ஒருவேளை முதல் நாளோ இரண்டாவது நாளோ இதனை கண்டித்திருக்கலாம். மணி இதனைத் தொடராமல் இருந்திருப்பான். ஒழுக்கின்மையும் வந்த வழியில் பின்னோக்கி சென்றிருக்கும். ஆனால் மணியின் பெற்றோர் அதனை செய்யவில்லை. ‘உங்க அப்பா பழக்கம் அப்படியே உனக்கும் ’ என பெருமையாய் சொன்ன அம்மாவும் அதைக்கேட்டு சிரித்த அப்பாவும் பெரிதாக எந்த தவறும் செய்திருக்கவில்லை. எறுப்பு ஊர தேயும் கல்லின் முதல் தேய்தலை எறும்பே அறிந்திருக்காதே. இதனையும் நாம் அந்த வகையில் சேர்க்கலாம்.

முன்பெல்லாம் வீட்டிற்குள் வரும் முன்பு தன் காலணியை அதற்கான குட்டி அலமாறியில் வைப்பது மணியின் வழக்கம். அதற்கென்றே அழகான பாதுகாப்பான குட்டி அலமாரி வாசல் அருகில் இருந்தது. மணியின் காலணி மட்டும் வலது காலுக்கானது வடக்கிலும், இடதுக் காலுக்கானது தெற்கிலும், இருக்கும். பல முறை காலணிகள் காணாமலும் போனது உண்டு. அலமாரியின் உள் வைக்கப்பட்ட பழைய நாளிதழை மாற்றுவதற்குள் புதுப்புது காலணிகளை மணியின் பெற்றோர்கள் வாங்கினர். தேய்ந்து போன காலணிக்கு பதில் புதிதாக வாங்கும் காலணியில் இருக்கும் திருப்தி காணாமல் போன காலணிக்கு பதிலாக வாங்குவதில் இல்லை. அதனை அவர்கள் பொருட்படுத்தவும் இல்லை. ம்.. அப்போதே பொருட்படுத்தியிருக்கலாம்.

படிப்பில் எந்த குறைபாடும் இல்லை. ஆம்... அதுவரையில் இல்லை என்றே சொல்லலாம். கட்டம் அமைத்து, கோடு கிழித்து, குழுக்கள் பிரித்த கால்பந்து விளையாட்டுக்கும்; கண்மூடித்தனாமான கால்பந்தாட்டத்திற்கும் வித்தியாசம் அவரவர் மனதில் மாறுபடும். மணிக்கு இரணாவதாய் சொன்னதில் ஆர்வம் எழுந்தது. பள்ளி இறுதியாண்டு விடுமுறையில் படிந்து சீவப்பட்டிருந்த முடியை வளர்த்து வானம் நோக்கி மாற்றினான். கறுமை நிறம் கொண்ட முடி, முன்புறம் மிட்டாய் வண்ணமாய் மினுக்கியது. புதிய தலைமுடியைக் கண்ட பெற்றோரின் கேள்விக்கு; பள்ளி விடுமுறைதானே என சமாளித்தான். அவர்களும் சரி என்றார்கள். இப்படிப்பட்ட பெற்றோர்க்கு நிச்சயம் மணி கொடுத்து வைத்திருக்க வேண்டும். ஆனால் இப்படி பட்ட மகன் கிடைக்க அந்த பெற்றோர், ம்.. என்ன சொல்வது..?

ஆரம்பபள்ளி முடித்து இடைநிலை பள்ளிக்குச் சென்றான். மூன்று நாள்கள், வானம் பார்த்த தலை முடியுடனே பள்ளியில் நடமாடினான் மணி. அதுவரையில் மணிக்கு இருந்த பழைய நண்பர்கள் மாறினர். தன்னைப் போலவே இருக்கும் புதுப்புது நண்பர்கள் வருகை மணிக்கு மேலும் கௌரவத்தையும் மகிழ்ச்சியையும் கொடுத்தது. ஒழுங்கின்மை அங்கு ஒழுக்கமின்மையாக பொறுப்பேற்றது. அதன் விளைவு சீக்கிரமேத் தெரிந்தது.
ஆறு ஆண்டுகள் தன்னுடன் படித்து வந்தவள் ப்ரேமா. நல்ல தோழியாக இருந்த ப்ரேமாவிற்கு காதல் கடிதம் கொடுக்கப் போகிறான். இச்செயலை மணியும் நினைத்திருக்க மாட்டான். கையெழுத்தில் வெளிவந்த ஒழுங்கின்மை, படுக்கை அறை , சமையல் அறை, அதன் ஊடே காலணி தொடர்ந்து தலைமுடி, நண்பர்கள் என மாறிமாறி தற்போது சிந்தனையிலும் நுழைந்துவிட்டது. ஒழுக்கமின்மையாக செயல்படத் தொடங்கியது.

காதல் கடிதத்திற்கு புதிய நண்பர்கள் துணையாய் இருந்தாலும்; அதனை தொடரும் எண்ணத்தைத் தூண்டியது என்னமோ பழைய மூளைதான். இந்த மூளையும் கொஞ்சம் கொஞ்சமாக நஞ்சினை சேர்த்தது; பழக்கத்தில் உள்புகுந்த ஒழுக்கமின்மை. கையெழுத்தின் வழி தன்னை வெளிகாட்டும் போதே கவனித்திருக்கலாம். வயல்வெளியில் வளர்ந்து நிற்கும் புதர்கள் வயலையே மறைப்பது போல; இதுவரையில் மணியிடம் இருந்த நல்ல பண்புகளும் இயல்புகளும் இனி இல்லை.

ஆசிரியர் அடித்ததால் உள்ளங்கை சிவந்திருந்தது. காதல் கடிதம் குறித்து ப்ரியா எதனையும் சொல்லவில்லை. அவளது தோழி செய்ததற்கு இவள் என்ன செய்வாள். மணிக்கு அறிவுரை மட்டுமே கூறிய ப்ரியா இதனை செய்திருக்க மாட்டாள் என மணிக்கும் யோசனை வரவில்லை. ஆத்திரம் அவன் கண்ணையும் தன் தோழி இதுவரை காட்டிய நட்பையும் மறைத்தது. அவளின் அழகி என்ற நினைப்புதான் தனது இந்த அவமானத்திற்கு காரணம் என முடிவு செய்தான். அதற்கு முற்றுப்புள்ளி வைக்க எண்ணினான்.

நண்பர்களிடம் ஆலோசனை கேட்டான். கடந்த ஆண்டு வரை படிக்கவும் பாடங்களைப் பகிரவும் தேவைப்பட்ட நண்பர்கள் இல்லாமல் புதிய வரவுகள் மணிக்கு யோசனையைக் கொடுத்தார்கள். அதிகம் செல்லவில்லை. தந்தையின் பணப்பையில் கைவைக்கும் அளவுக்கு மட்டுமே தொகை இருந்தது. அமிலம் வாங்க பணமும் அதனை எடுக்க திட்டமும் கிடைக்கப் பெற்றான் மணி.
அமிலத்தை கண்ணாடி போத்தலில் கொடுத்த நண்பர்கள் மத்தியில் தனது திட்டத்தை விவரித்தான் மணி. படிக்கவும் அதன் படி நடக்கவும் போட வேண்டிய திட்டங்கள் இவை. இன்று தன் தோழி மீது வந்த வன்ம எண்ணதால் அவள் முகத்தினை சிதைக்கப் போடப்படுகிறது. அவள் பாவம் இல்லையா...? அவள் செய்யாத தவறுக்கு தன் முக அழகை இழக்கப் போகிறாள். இனி வாழ்நாள் முழுவதும் கோர முகத்துடன்தான் இருக்கப்போவதை நினைத்தால்... பாவம் அவள்.

மணி தனது நண்பர்களிடம் சொன்ன திட்டத்தினை செயல்படுத்த ஆயுத்தமானான். கால் சட்டைப் பையில் கண்ணாடி போத்தலுடன் வந்துக் கொண்டிருந்தான்.போத்தலில் அமிலம் தயாராய் இருந்தது. இந்த நேரம் ப்ரேமா தனியாக ஆங்கில வகுப்பிற்கு வருவாள். இன்று ஏனோ தாமதம். நல்ல மனிதனின் மனதினை கெடுக்கும் தீய எண்ணங்கள் போல; மணியின் அந்த புதிய நண்பர்கள் கூட்டத்திலும் ஒரு நல்லவன் இருந்திருக்க வேண்டும். அவன் நல்லவனா இல்லையா என்பதைவிட அந்த கூட்டத்தில் அவன் ஒரு கறுப்பு ஆடு என்றே சொல்லலாம். அப்படித்தன் இனி மற்றவர்கள் அவனை சொல்வார்கள். கறுப்பு ஆடு.

ப்ரேமாவுக்கு தன் மீது நல்ல எண்ணம் கிடைக்கலாம் என்ற எண்ணத்தில் கூட அந்த கருப்பு ஆடு இதனைச் செய்திருக்கலாம்.

பிரேமாவை பின் தொடர்ந்து வந்துக் கொண்டிருந்த அவளின் தந்தையையும் அவரின் நண்பர் ஒருவரையும் மணி கவனிக்கவில்லை. அவள் வழக்கத்திற்கு மாறாக பின்னால் திரும்பியும் ஏதோ பதட்டமுமாய் வருவதை தாமதமாகத்தான் கவனித்தான். ப்ரேமாவும் தன் கண்ணால் எதிரே வந்துக் கொண்டிருக்கும் மணிக்கு எதையோ சொல்ல முயற்சித்தால்.
கண் புருவத்தை உயர்த்தி தன் கால்சட்டைப் பையில் கையை வைத்தாள். பிறகு தன் கண்ணத்தில் கை வைத்தாள். அவள் பின்னால் கொஞ்சம் திரும்பும்படி காட்டிய செய்கையில் மணிக்கு புரிந்தது. மணி வந்த வேகத்திலேயே பின்னால் ஓட ஆரம்பித்தான். அவனது ஓட்டத்தில் வழக்கத்திற்கு மாறான வேகம் இருந்தது. ஓட்டத்தில் மட்டுமல்ல, மூளையிலும்தான்.

அதிவேகமாய் ஓடியவன், எப்படியோ கால் தடுக்கி கீழே விழுந்தான். கால்சட்டைப் பையில் வைத்திருந்த கண்ணாடி போத்தால் பையிலேயே உடைந்தது. பிறகென்ன ப்ரேமாவுக்காகக் கொண்டு வந்திருந்த அமிலம் தன் காலில் சிந்தியது. சிந்திய இடத்தில் தோல் பொசுங்கியது.

கண்விழித்து பார்த்த மணியின் முன் ப்ரேமாவும் அவளது தந்தையும் தந்தையின் போலிஸ்கார நண்பரும். அந்த நேரம், அவர்கள் நிகழ்த்திய உரையாடல் மணியின் மூளைக்குள் மின்சாரத்தை பாய்ச்சியது. உரையாடல்தான் எத்தனை விதமாக இருக்கிறது. கைகலப்பிற்கும் காரணமாகிறது, சில மன எழுச்சிக்கும் காரணமாகிறது. சரியான உரையாடல், சரியான நபர், சரியா நேரம், இதனை பொறுத்தே உரையாடலில் விளைவு மாறுபடலாம்.

மூளைக்குள் புகுந்த மின்சாரமும் காலில் வலிக்கும் பொசுங்கிய தோலும்; கிடைத்த தனிமையும் மணியை யோசிக்க வைத்திருக்க வேண்டும். இனி ப்ரேமா அவனுக்கு எதிரி அல்ல. இந்த சம்வத்திற்கு பிறகு மணியில் பெற்றோர் அவன் மீது கொண்டிருந்த கொஞ்சநஞ்ச அக்கறையையும் குறைத்தனர். அவர்களிடம் இருந்த இடைவேளி மணிக்கு மேலும் வலித்தது.
மனம் வருந்தி மன்னிப்பு கேட்டான் புதிய மணி. தங்கள் மீதும் தவறு இருப்பதை உணர்ந்தனர் பெற்றோர்.

மூளையில் இறங்கிய மின்சாரம் ஒவ்வொரு இடமாக பிரவேசித்தது. மணியின் சிந்தனை மாறியது, சிந்தனை செயலை மாற்றியது, செயல் பழக்கத்தை மாற்றியது, மாறியப் பழக்கம், அவனது வழக்கத்தை மாற்றியது, மணியின் வாழ்க்கை முறையும் மாறியது.

இது நடந்து பல ஆண்டுகள் ஆகிவிட்டன. மணிக்கும் பவானிக்கும் திருமணம். இருவர்க்கும் ஆனந்தன் ஒரே வாரிசாகப் பிறந்தான். அவனுக்கும் திருமணம் முடிந்தது. இன்று பேரன் பேத்திகளுடன் மகிழ்ச்சியான வாழ்க்கை மணிக்கு அமைந்திருந்தது. இப்போது மணியின் வயது நாற்பத்தைந்து இருக்கலாம்.

கதையின் முடிவு 1

மணியின் படுக்கையறை அலங்கோலமாக இருந்தது. சாப்பிட்ட தட்டை அப்படியே வைக்கபட்டிருந்தது. மணி சாய்வு நாற்காலியில் சாய்ந்து யாருக்கோ கடிதம் எழுதிக் கொண்டிருக்கிறார். மணியின் மையெழுத்து மீண்டும் அலங்கோலமாக மாறியிருந்தது.

கதையின் முடிவு 2

மணி தன் பேரனின் அறையில் நிற்கின்றார். அங்கே படுக்கையறை அலங்கோலமாக இருக்கிறது. பேரனின் புத்தகம் இன்றினை எடுத்த பக்கங்களைத் திறக்கின்றார். எழுத்துகள் ஒழுங்கற்ற முறையில் இருக்கிறது. தாத்தா மணி பேரனை கூப்பிடுகின்றார்.

கதையின் முடிவு 3
முன்றாவது முடிவாக, நீங்கள் நினைப்பதை எழுதுங்கள். கையெழுத்தை கவனியுங்கள். அவை ஒழுங்காக இருக்கின்றவா...?

தயாஜி........

புத்தகங்கள்

10.8.2011 - தோழர்கள் அழைக்க புத்தகக்கடைச் சென்றேன். வெறுங்கையுடன் எப்படி திரும்புவேன். அதான் கொஞ்ச நாட்களாய் தேடிய புத்தகங்கள் மீது தேடல் தொடுத்து வாங்கினேன். என்ன ஆச்சர்யம் என்றால் முதன்முதலாக 10 நிமிடத்திற்குள் வாங்கிய புத்தகங்கள் இவை.

1.ரஜினி முதல் பிரபாகரன் வரை 60 பிரபலங்கள் பற்றிய 25 அபூர்வ தகவல்கள்.
-விகடனின் வந்த பகுதி இது.
-60 பிரபலங்கள் குறித்த சுவாரஸ்ய தகவல்கள்.

2.ஒரு கதவும் கொஞ்சம் கள்ளிப்பாலும்.
- பாடலாசிரியர் தாமரையின் முதல் கவிதை தொகுப்பு இது.

3.விண்வெளி கிராமம்.
-விஞ்ஞான சிறுகதை.
-எழுத்து நெல்லை சு.முத்து.

4.விட்டுவிடு கருப்பா.
-மர்ம அமமனுஷ்ய நாவல்.
-எழுத்து இந்திரா சௌந்தரராஜன்.
- 'விடாது கருப்பு' என்ற தொடரின் மூலம்.

5.கான்பிடன்ஸ் கார்னர்.
-100 நம்பிக்கை , குட்டிக்கதைகள்.
-எழுத்து மரபின் மைந்தன் ம.முத்தையா