- அவரவர் அழும் நேரம் -

சிவப்பு விளக்கில்
மோட்டாரை நிறுத்தி
தலைக்கவசத்தைக் கழட்டி
அந்த உச்சி வெய்யில்
நேரத்தில்
சாலையோரத்தில்
தன்னைத்தானே தலையில்
அடித்துக் கொண்டான்
மூன்று முறை கன்னத்தில்
அரைந்து கொண்டான்
யார் பார்த்தால் எனக்கென்ன
என்றவாறு
காது கிழியும் சத்தத்துடன் கத்தினான்.

மஞ்சள் விளக்கில்
கண்ணீரைத் துடைத்துக்கொண்டான்
தலைக்கவசத்தை
மீண்டும் அணிந்து கொண்டான்
தொண்டையை செருமிக்கொண்டான்.

பச்சை விளக்கில்
அவன் பயணம் தொடர்ந்தது
தன் துயரை அனுபவிக்க
அவனுக்கு ஒதுக்கப்பட்ட நேரம்
முடிந்தது

அடுத்த நிறுத்தத்தில்
மீண்டும் நிற்கும்வரை
அழுவதற்கு
நேரம் இருக்கப்போவதில்லை.